काठमाडौं । स्टेलान्टिसको प्राविधिक र रणनीतिक समर्थनका साथ लिपमोटरले नोभेम्बर महिनामा ७०,३२७ इलेक्ट्रिक सवारी साधन ग्राहकहरूलाई हस्तान्तरण गर्दै आफ्नो नयाँ मासिक वितरण रेकर्ड दर्ज गरेको छ। यो आँकडाले कम्पनीलाई लगातार सातौं महिनासम्म बिक्री वृद्धि कायम गर्न मद्दत गरेको छ।

नोभेम्बरको वितरण संख्या गत वर्षको सोही अवधिको तुलनामा ७५ प्रतिशतले वृद्धि भएको कम्पनीले जनाएको छ। यससँगै जनवरीदेखि नोभेम्बर सम्म लिपमोटरका सवारी वितरण ५,३६,१३२ युनिट पुगेका छन्, जसमा ११३ प्रतिशत वार्षिक वृद्धि देखिएको छ।

कम्पनीले २०२५ को प्रारम्भिक लक्ष्यका रूपमा तोकेको ५ लाख युनिट वितरण पहिले नै पार गरिसकेको छ। यस वर्षको कुल वितरण लक्ष्यलाई बढाउँदै लिपमोटरले अब ५८०,००० देखि ६५०,००० युनिट बीच पुर्‍याउने योजना सार्वजनिक गरेको छ। कम्पनीले २०२६ सम्ममा वार्षिक १० लाख सवारी बिक्री गर्ने दीर्घकालीन लक्ष्य राखेको छ।

लिपमोटरको सशक्त बजार प्रदर्शनमा कम्पनीले विस्तार गर्दै ल्याएका Lafa 5 इलेक्ट्रिक ह्याचब्याक, A10 कम्प्याक्ट इलेक्ट्रिक SUV, तथा ८०-kWh ब्याट्री प्याकसहितको D19 फ्ल्यागशिप SUV जस्ता मोडेलहरूले महत्वपूर्ण योगदान गरेको कम्पनीको दाबी छ।

आगामी डिसेम्बर २८ मा आफ्नो १०औँ वार्षिकोत्सव मनाउन तयारी गरिरहेको लिपमोटरले नेपालसहित विश्वका विभिन्न बजारमा उच्च गुणस्तर, उन्नत प्रविधि र प्रभावकारी इलेक्ट्रिक सवारी साधन उपलब्ध गराउने अभियानलाई अझ तीव्रता दिने जनाएको छ।