काठमाडौं । नेपाल लाइफ इन्स्योरेन्स कम्पनी लिमिटेडले आर्थिक वर्ष २०८०/८१ का लागि नयाँ बोनस दर सार्वजनिक गरेको छ। नेपाल बीमा प्राधिकरणबाट पुस १२ गते स्वीकृति पाएपछि कम्पनीले आर्थिक लेखाजोखा र दायित्व मूल्याङ्कनसम्बन्धी बीमाङ्कीय प्रतिवेदनका आधारमा बोनस दर निर्धारण गरेको हो।

कम्पनीका अनुसार बीमितलाई प्रतिहजार बीमांकमा न्यूनतम ५५ रुपैयाँदेखि अधिकतम ८५ रुपैयाँसम्म बोनस प्रदान गरिनेछ। बोनस दर सुरक्षित जीवन, जीवन ज्योति, ग्रामीण सावधिक, सावधिक लघु, केटाकेटी सुरक्षित भविष्य, शिक्षा जीवन बीमा, जीवन लक्ष्मी तथा जीवन उदय (एकल) लगायतका योजनामा लागू हुनेछ।

‘नौलो सुरक्षित’ र ‘नौलो केटाकेटी’ जीवन बीमा योजनामा बीमा अवधिअनुसार ६५ देखि ८२ रुपैयाँसम्म बोनस तोकिएको छ।
‘जीवन समुन्नत’ योजनामा ५६ देखि ७० रुपैयाँ, ‘सुनौलो भविष्य’ (विकल्प १ र २) योजनामा ६० देखि ६५ रुपैयाँ, र एकल बीमाशुल्क विकल्पमा ५५ देखि ६० रुपैयाँ बोनस निर्धारण गरिएको छ।

सावधिक तथा आजीवन बीमालेख अन्तर्गत ‘जीवन साहारा’ र ‘अनमोल जीवन’ योजनामा बीमितले ६० देखि ८२ रुपैयाँसम्म बोनस पाउनेछन्।

अग्रिम भुक्तानी सावधिक बीमालेख ‘जीवन समृद्धि’ योजनामा सबै अवधिका लागि ५० रुपैयाँ, तथा धन वर्षा, नौलो धन वर्षा, जीवन उन्नति, छोराछोरी र सदावहार जीवन योजनामा ५६ रुपैयाँ बोनस तोकिएको छ।

‘नौलो जीवन समृद्धि’ योजनामा पनि सबै अवधि बराबर ५६ रुपैयाँ बोनस कायम गरिएको छ।
अन्य योजनामध्ये ‘जीवन सारथी’ बीमालेखमा बीमा अवधिअनुसार ६२ देखि ८५ रुपैयाँसम्म बोनस पाउने व्यवस्था गरिएको कम्पनीले जनाएको छ।