काठमाडौं । रोयल इनफिल्डको बजेट श्रेणीमा पर्ने हन्टर ३५० अब इन्जिन तथा फिचर अपडेटसहित नेपाली बजारमा आएको छ। नेपाली बजारमा पहिले नै उपलब्ध यो मोडल अब बीएस–६ इन्जिनसहित सार्वजनिक गरिएको हो।

नेपालका लागि रोयल इनफिल्डको आधिकारिक वितरक अल्फा अटोमोटिभ्सले सोमबार आयोजित कार्यक्रममार्फत नयाँ हन्टर ३५० लन्च गरेको हो। कार्यक्रममै ११ जना ग्राहकलाई बाइकको चाबी हस्तान्तरण गरिएको थियो।

सिंगल र डुअल टोन भेरियेन्टमा उपलब्ध हन्टर ३५० को मूल्य क्रमशः ४ लाख ९५ हजार र ५ लाख रुपैयाँ तोकिएको छ। कम्पनीका अनुसार नयाँ हन्टर ३५० नेपालमै एसेम्बल गरिनेछ।

अपडेटेड मोडलमा डुअल च्यानल एबिएस, स्लिप असिस्ट क्लच, नयाँ सस्पेन्सन सेटअप, डिजिटल क्लस्टर, पूर्ण LED लाइट र उच्च ग्राउन्ड क्लियरियन्स जस्ता फिचर समावेश गरिएका छन्।

कम्पनीले इन्जिन र फिचर दुवैमा गरिएको सुधारले हन्टर ३५० लाई नेपाली बजारमा अझ आकर्षक र प्रतिस्पर्धी बनाउने विश्वास व्यक्त गरेको छ।