काठमाडौं । नेपालको पहिलो बैंक नेपाल बैंक लिमिटेडले आफ्ना कर्मचारी तथा खातावाल ग्राहकहरूलाई लक्षित गर्दै ‘टप अप गरौं, बोनस पाऔं’ अभियान सञ्चालनमा ल्याएको छ। बैंकको सेवा प्रदायक क्याट इन्टरनेशनल प्रा.लि.को सहकार्यमा ब्रान्ड प्रवर्द्धन तथा डिजिटल बैंकिङ व्यवसाय अभिवृद्धि गर्ने उद्देश्यले उक्त अभियान सञ्चालन गरिएको हो।

२०८२ साल पौष महिनाभर लागू हुने यस अभियानअन्तर्गत नेपाल बैंक मोबाइल बैंकिङ एपमार्फत रु. २०० वा सोभन्दा बढी रकमको टप अप गर्ने ८० जना ग्राहकलाई जनही रु. १०० का दरले बोनस प्रदान गरिने बैंकले जनाएको छ। बोनस प्राप्त गर्ने ग्राहकको घोषणा अभियान अवधि समाप्त भएपछि गरिनेछ।

यस अभियानले बैंकको डिजिटल बैंकिङ सेवा प्रयोगलाई प्रोत्साहन गर्दै डिजिटल कारोबार विस्तारमा महत्वपूर्ण योगदान पुग्ने विश्वास बैंकले लिएको छ।

हाल नेपाल बैंक लिमिटेडले देशभर २३१ शाखा, २३७ एटिएम तथा ६१ एक्सटेन्सन काउन्टरमार्फत करिब २७ लाख ग्राहकलाई वित्तीय सेवा प्रदान गर्दै आएको छ। बैंकका करिब १० लाख ग्राहक डिजिटल प्रविधिमार्फत बैंकिङ सेवा लिँदै लाभान्वित भइरहेका छन्। ग्राहक सेवामा निरन्तर सुधार गर्दै नेपाल बैंक आधुनिक बैंकिङ प्रविधिसहित प्रतिस्पर्धी बैंकको रूपमा अघि बढिरहेको छ।