काठमाडौँ । क्लब चौलानी लिमिटेडले प्रारम्भिक सार्वजनिक निष्कासन (आईपीओ) जारी गर्नका लागि गरिमा क्यापिटल लिमिटेडलाई निष्कासन तथा बिक्री प्रबन्धक (Issue Manager) नियुक्त गरेको छ ।

क्लब चौलानी लिमिटेड र गरिमा क्यापिटल लिमिटेडबीच साधारण सेयर निष्कासन तथा बिक्री प्रबन्धसम्बन्धी सम्झौता २०८२ साल पौष ०९ गते काठमाडौँको बुढानीलकण्ठस्थित होलिडे इन रिसोर्टमा सम्पन्न एक कार्यक्रमका बीच भएको हो । सम्झौतापत्रमा क्लब चौलानी लिमिटेडका तर्फबाट अध्यक्ष श्री राजेन्द्र के.सी.ज्यू तथा गरिमा क्यापिटल लिमिटेडका तर्फबाट प्रमुख कार्यकारी अधिकृत श्री निर्मल भट्टराईज्यूले हस्ताक्षर गर्नुभएको छ ।

वि.सं. २०७५ साल वैशाख २५ गते प्राइभेट लिमिटेड कम्पनीका रूपमा स्थापना भएको क्लब चौलानी लिमिटेड २०७९ साल पौष २२ गते पब्लिक लिमिटेडमा रूपान्तरण भएको हो । कम्पनीले सुदूरपश्चिम प्रदेशको एक नमूना तथा पहिलो पाँचतारे होटलका रूपमा आफूलाई स्थापित गर्ने लक्ष्य लिएको जनाएको छ ।

कम्पनीले आफ्नो जारी पूँजीको २० प्रतिशत बराबरको सेयर सर्वसाधारणका लागि आईपीओमार्फत निष्कासन गर्ने तयारी गरेको छ ।

गरिमा क्यापिटल लिमिटेड, गरिमा विकास बैंक लिमिटेडको सहायक कम्पनी तथा नेपाल धितोपत्र बोर्डबाट अनुमति प्राप्त मर्चेन्ट बैंकर हो । संस्थाले पोर्टफोलियो म्यानेजमेन्ट सेवा, डिपोजिटरी पार्टिसिपेन्ट सेवा, म्युचुअल फन्ड व्यवस्थापन, धितोपत्र प्रत्याभूति, निष्कासन तथा बिक्री प्रबन्ध, सेयर रजिष्ट्रार तथा कर्पोरेट परामर्श सेवा प्रदान गर्दै आएको छ ।