काठमाडौं । नेपाल चार्टर्ड एकाउन्टेन्ट्स संस्था (आइक्यान) का निवर्तमान अध्यक्ष सिए प्रविणकुमार झा सन् २०२६ का लागि साउथ एसियन फेडेरेसन अफ एकाउन्टेट्स (साफा) को उपाध्यक्षमा मनोनीत हुनुभएको छ। उहाँको कार्यकाल सन् २०२६ को जनवरी १ बाट सुरु भइसकेको छ।

आइक्यानले यो मनोनयनलाई नेपाली लेखा व्यवसायको क्षेत्रीय स्तरमा बढ्दो मान्यता र पहिचानको प्रतिबिम्बका रूपमा लिएको छ। यसअघि आइक्यानका पूर्वअध्यक्ष सिए कोमलबहादुर चित्रकार र सिए डा. सुवोधकुमार कर्णले क्रमशः सन् २०१० र २०१८ मा साफाको अध्यक्षको रूपमा नेतृत्व गर्नुभएको थियो। उहाँहरूको नेतृत्वले आइक्यानका लागि क्षेत्रीय तथा अन्तर्राष्ट्रिय स्तरमा महत्वपूर्ण कोसेढुंगा स्थापित गरेको आइक्यानको भनाइ छ।

आइक्यानले नयाँ जिम्मेवारीका लागि सिए प्रविणकुमार झालाई बधाई तथा शुभकामना व्यक्त गर्दै उहाँको नेतृत्वले क्षेत्रीय सहकार्यलाई सुदृढ गर्दै दक्षिण एसियामा लेखा व्यवसायलाई थप बलियो बनाउने विश्वास व्यक्त गरेको छ।