लहान । कामना सेवा विकास बैंक लिमिटेडले संस्थागत सामाजिक उत्तरदायित्व अन्तर्गत लहान नगरपालिका वडा नं. ५ का गरिब, दलित तथा अति विपन्न परिवारलाई जाडोयाम लक्षित फाइबर सिरक वितरण गरेको छ।

बैंकको लहान शाखा कार्यालयमार्फत आयोजित कार्यक्रममा मधेश प्रदेश प्रमुख श्याम चवाईंले स्थानीय बासिन्दालाई फाइबर सिरक वितरण गर्नुभएको हो। सो अवसरमा उहाँले सामाजिक उत्तरदायित्व अन्तर्गत सञ्चालन गरिएका यस्ता कार्यक्रमहरूले स्थानीय समुदायलाई महत्वपूर्ण सहयोग पुग्ने विश्वास व्यक्त गर्नुभयो।

जाडोयाममा आवश्यक सामग्री सहयोगस्वरूप प्राप्त भएपछि स्थानीयवासीहरूले खुशी व्यक्त गर्दै बैंकको मानवीय पहलप्रति आभार प्रकट गरेका छन्।

सिरक वितरण कार्यक्रममा कामना सेवा विकास बैंकका कर्मचारी, लहान नगरपालिका वडा नं. ५ का वडा अध्यक्ष, उद्योग वाणिज्य संघका अध्यक्ष तथा स्थानीयवासीहरूको उपस्थिति रहेको थियो।

बैंकले आगामी दिनहरूमा पनि सरोकारवालाहरूसँगको समन्वय तथा सहकार्यमा यस्ता सामाजिक उत्तरदायित्वसम्बन्धी कार्यक्रमलाई निरन्तरता दिने जनाएको छ।