राप्ती नगरपालिका–१२ । कामना सेवा विकास बैंक लिमिटेडले आफ्नो संस्थागत सामाजिक उत्तरदायित्व (CSR) अन्तर्गत राप्ती नगरपालिका–१२ स्थित श्री भविष्य निर्माण आधारभूत विद्यालयका विद्यार्थीलाई न्यानो कपडा वितरण गरेको छ। बैंकको खुर्खुरे शाखामार्फत गरिएको सो कार्यक्रममा कक्षा १ देखि ३ सम्म अध्ययनरत ७० जना चेपाङ बालबालिकालाई चिसो याम लक्षित गर्दै न्यानो कपडा हस्तान्तरण गरिएको हो।

नारायणगढ क्षेत्र प्रमुख सुरेन्द्र भण्डारीले विद्यालयमा उपस्थित भई न्यानो कपडा वितरण गरे। कार्यक्रमलाई सम्बोधन गर्दै उनले विपन्न र सीमान्तकृत समुदायका बालबालिकाको स्वास्थ्य र शिक्षा दुवैमा सहयोग पुग्ने विश्वास व्यक्त गरे।

समारोहका प्रमुख अतिथि तथा राप्ती नगरपालिका–१२ का वडा अध्यक्ष अर्जुन प्रजाले बैंकले समुदायप्रति देखाउँदै आएको निरन्तर सहयोगको प्रशंसा गर्दै धन्यवाद व्यक्त गरे। त्यसैगरी विद्यालय व्यवस्थापन समितिका अध्यक्ष जीत बहादुर प्रजाले बैंकले विद्यालयप्रति देखाएको चासो र विद्यार्थी हितमा गरेको योगदानको उच्च मूल्यांकन गर्दै बैंक परिवारको आगामी सफलताको शुभकामना दिए।

कार्यक्रममा बैंकका कर्मचारी, वडा सदस्य अशोक जिम्बा, राप्ती नगरपालिकाका सब–इन्जिनियर विजय पौडेल, विद्यालय व्यवस्थापन समितिका प्रतिनिधि तथा अभिभावकहरूको उल्लेखनीय सहभागिता रहेको थियो।

कामना सेवा विकास बैंकले आगामी दिनहरूमा पनि स्थानीय सरोकारवालाको सहकार्यमा सामाजिक उत्तरदायित्वअन्तर्गत यस्ता जनहितकारी कार्यक्रमलाई निरन्तरता दिने जनाएको छ।