काठमाडौं। एनएनएलजी इन्स्योरेन्स कम्पनीको २० औँ वार्षिक साधारणसभा आज काठमाडौंको गैह्रीधारास्थित सिल्भर ओक ब्यांक्वेट एन्ड इभेन्ट्स सेन्टरमा सम्पन्न भएको छ।

सभाले आर्थिक वर्ष २०८१/८२ का लागि प्रस्तावित हाल कायम चुक्तापुँजी २ अर्ब ५६ करोड ५२ लाख २४ हजार ४३२ रुपैयाँको कुल ७.३६८४ प्रतिशत लाभांश अनुमोदन गरेको छ। यसमा ४ प्रतिशत बोनस शेयर (१० करोड २६ लाख ८ हजार ९७८ रुपैयाँ बराबर) र ३ प्रतिशत नगद लाभांश (७ करोड ६९ लाख ५६ हजार ७३३ रुपैयाँ बराबर) समावेश छ। कर प्रयोजनार्थ ०.३६८४ प्रतिशत (९४ लाख ५० हजार ८२७ रुपैयाँ) छुट्याइएको छ।

बोनस शेयर वितरणपछि कम्पनीको चुक्तापुँजी २ अर्ब ६६ करोड ७८ लाख ३३ हजार ४०९ रुपैयाँ पुग्ने भएकोले, प्रबन्धपत्र र नियमावलीमा संशोधन गर्ने प्रस्ताव सभाले पारित गरेको छ। साथै, नियमनकारी निकायको कुनै रायसुझाव वा निर्देशन आएमा त्यसअनुसार गर्न सञ्चालक समितिलाई अख्तियारी प्रदान गर्ने प्रस्ताव पनि अनुमोदन गरिएको छ।

सभाले गत आर्थिक वर्षको वार्षिक तथा लेखापरीक्षकको प्रतिवेदन स्वीकृत गरेको छ भने, चालु आर्थिक वर्ष २०८२/८३ का लागि लेखापरीक्षकको नियुक्ति र पारिश्रमिक निर्धारणसम्बन्धी प्रस्ताव पनि पारित गरेको छ।