काठमाडौं । कामना सेवा विकास बैंकले आफ्नो सामाजिक उत्तरदायित्व कार्यक्रमअन्तर्गत रानीपोखरीस्थित भानु माध्यमिक विद्यालय (दरबार हाई स्कूल) मा अध्ययनरत गरिब तथा विपन्न वर्गका विद्यार्थीहरूलाई छात्रवृत्ति प्रदान गरेको छ। विद्यालयको १७२औँ स्थापना दिवस तथा अभिभावक दिवसको अवसरमा उक्त छात्रवृत्ति प्रदान गरिएको हो।

विद्यालयमा अध्ययनरत करिब १ हजार १०० भन्दा बढी विद्यार्थीमध्ये आर्थिक अभावका कारण पठनपाठन प्रभावित हुन सक्ने अवस्थालाई ध्यानमा राख्दै बैंकले छात्रवृत्ति उपलब्ध गराएको जनाएको छ। छात्रवृत्ति रकम बैंकका मार्केटिङ विभाग प्रमुख पर्मा ढुङ्गेलले विद्यालयकी प्रधानाध्यापक शारदा कुमारी पौडेललाई हस्तान्तरण गर्नुभएको थियो।

कार्यक्रममा बोल्दै प्रधानाध्यापक पौडेलले जेहेन्दार तथा अनुशासित विद्यार्थीहरूलाई छात्रवृत्ति प्रदान गरी उनीहरूको हौसला अभिवृद्धि गर्न र उज्ज्वल शैक्षिक भविष्यतर्फ अघि बढ्न सहयोग पुर्‍याएकोमा बैंक परिवारप्रति धन्यवाद व्यक्त गर्नुभयो।

त्यसैगरी बैंकका मार्केटिङ विभाग प्रमुख ढुङ्गेलले बैंकले सामाजिक उत्तरदायित्वअन्तर्गत शिक्षा क्षेत्रमा निरन्तर योगदान पुर्‍याउँदै आएको उल्लेख गर्दै आगामी दिनमा पनि यस्ता सामाजिक कार्यक्रमलाई निरन्तरता दिने प्रतिबद्धता व्यक्त गर्नुभयो।

कार्यक्रममा विद्यालय व्यवस्थापन समिति अध्यक्ष, प्रधानाध्यापक, शिक्षक–शिक्षिका, अभिभावक तथा बैंकका प्रतिनिधिहरूको उपस्थिति रहेको थियो। बैंकले आगामी दिनहरूमा पनि सरोकारवालाहरूसँगको समन्वय र सहकार्यमा यस्ता कार्यक्रमहरूलाई निरन्तरता दिने जनाएको छ।