काठमाडौं । सूर्यज्योति लाइफ इन्स्योरेन्स कम्पनीलाई इण्डियन च्याम्बर अफ कमर्सद्वारा आयोजित ‘इमर्जिङ एशिया इन्स्योरेन्स अवार्ड २०२५’ अन्तर्गत सम्मान गरिएको छ।

अवार्डको छैटौं संस्करणअन्तर्गत ६ फेब्रुवरी २०२६ मा थाइल्याण्डको बैंककमा आयोजित कार्यक्रममा सूर्यज्योति लाइफले ‘बेष्ट इनोभेसन लिड बाई टेक्नोलोजी एण्ड इन्स्योरेटेक’ (नेपाल विधा) मा अवार्ड प्राप्त गरेको हो।

उक्त कार्यक्रममा भारत, नेपाल, बंगलादेश, भुटान, श्रीलंका, म्यानमार र थाइल्याण्ड लगायत विभिन्न देशका बीमा कम्पनीका उच्च पदाधिकारीहरूको सहभागिता रहेको थियो। विश्वप्रसिद्ध चार्टर्ड एकाउन्टेन्सी तथा कन्सल्टेन्सी संस्था पीडब्ल्यूसी, इन्डियन इन्स्टिच्युट अफ इन्स्योरेन्स, अन्तर्राष्ट्रिय बीमा विज्ञ लगायत प्रतिष्ठित संस्थाहरूले स्वतन्त्र रूपमा मूल्यांकन गरी विभिन्न वित्तीय सूचकका आधारमा अवार्ड प्रदान गरेका हुन्।

उक्त अवार्ड सूर्यज्योति लाइफ इन्स्योरेन्स कम्पनीका अध्यक्ष केशव प्रसाद भट्टराईले ग्रहण गरेका थिए। कार्यक्रममा कम्पनीका सञ्चालक चुडामणि देवकोटा, नायब प्रमुख कार्यकारी अधिकृत फर्शुराम मरासिनी तथा चिफ सपोर्ट सर्भिसेज प्रमुख उमेश प्रसाद मैनालीको पनि उपस्थिति रहेको थियो।

कम्पनीले विभिन्न सूचकमा उत्कृष्ट कार्यसम्पादन गर्दै नवप्रवर्तन र डिजिटलीकरणमार्फत आफ्नो अलग पहिचान बनाउन सफल भएको जनाएको छ। अन्तर्राष्ट्रिय स्तरको अवार्ड प्राप्त गर्न कम्पनीका कर्मचारी र अभिकर्ताहरूको महत्वपूर्ण योगदान रहेको उल्लेख गर्दै अध्यक्ष भट्टराईले नियामक निकाय बीमा प्राधिकरणको मार्गनिर्देशन तथा सञ्चालक समितिको सहयोग र विश्वासप्रति कृतज्ञता व्यक्त गरेका छन्।