काठमाडौं । चालु आर्थिक वर्षको ११ महिनामा देशभर ४ हजार २४९ युनिट विद्युतीय स्कुटर तथा बाइक दर्ता भएका छन्। यातायात व्यवस्था कार्यालयका अनुसार यस अवधिमा ३ हजार ७४१ युनिट विद्युतीय स्कुटर र ५०८ युनिट इलेक्ट्रिक बाइक दर्ता भएका हुन्।

कार्यालयका अनुसार पछिल्लो समय विद्युतीय दुई पांग्रेको दर्ता घट्दो क्रममा रहेको छ। मंसिर महिनामा सबैभन्दा धेरै ७४७ युनिट विद्युतीय स्कुटर र बाइक दर्ता भएको थियो। तर पछिल्लो महिना वैशाखमा जम्मा २५० युनिट मात्रै दर्ता भएको कार्यालयले जनाएको छ। यस आधारमा विद्युतीय दुई पांग्रेको दर्ता करिब ७० प्रतिशतले घटेको देखिएको छ।

महिनागत विवरणअनुसार चालु आर्थिक वर्षको साउनमा ४४९ युनिट, भदौमा ५२५ युनिट, असोजमा ३७१ युनिट र कात्तिकमा ५८६ युनिट दर्ता भएका थिए। मंसिरमा भने दर्ता संख्या बढेर ७४७ युनिट पुगेको थियो।

त्यसपछि दर्ता दर घट्दै गएको देखिन्छ। पुसमा ६२९ युनिट, माघमा १९० युनिट, फागुनमा ४८ युनिट, चैतमा १५४ युनिट, वैशाखमा २५० युनिट र जेठमा २३० युनिट विद्युतीय स्कुटर तथा बाइक दर्ता भएका छन्।