काठमाडौं । नेपाल टेलिकमले जीएसएम प्रिपेड सिम प्रयोग गर्ने ग्राहकका लागि अनलाइनमार्फत केवाईसी (ग्राहक विवरण) अद्यावधिक गर्ने सुविधा सुरु गरेको छ। कम्पनीले आफ्नो २२औं वार्षिकोत्सवको अवसर पारेर माघ २२ गतेदेखि देशभरका सबै कार्यालयमार्फत यो सेवा उपलब्ध गराएको जनाएको छ।

यसअघि गत पुस २२ गते दूरसञ्चार कार्यालय, सुन्धाराबाट उक्त सेवाको परीक्षण शुभारम्भ गरिएको थियो। अब ग्राहकहरूले कम्पनीमा रहेको आफ्नो व्यक्तिगत विवरण आफैं अनलाइनमार्फत सच्याउन तथा अद्यावधिक गर्न सक्नेछन्।

नेपाल टेलिकमका अनुसार विवरण अद्यावधिक गर्न ग्राहकहरूले कस्टमर लगइन पोर्टलमार्फत आवश्यक जानकारी भर्नुपर्नेछ। यस क्रममा सम्बन्धित मोबाइल नम्बरमा प्राप्त ओटीपी प्रयोग गरी आफ्नो व्यक्तिगत विवरण तथा आफूले धेरै सम्पर्क गर्ने पाँच वटा मोबाइल नम्बरसमेत उल्लेख गर्नुपर्ने व्यवस्था गरिएको छ।

अनलाइनमार्फत विवरण भरेपछि प्रमाणीकरणका लागि ग्राहकहरूले नजिकको नेपाल टेलिकम कार्यालय वा ग्राहक सेवा केन्द्रमा सम्पर्क गर्नुपर्नेछ। त्यसपछि कम्पनीको प्रणालीमार्फत विवरण प्रमाणित गरी अद्यावधिक गरिनेछ।

कम्पनीले हालसम्म धेरै ग्राहकको व्यक्तिगत विवरण अद्यावधिक नभएको अवस्थामा नयाँ सेवाले विवरण सच्याउन सहज बनाउने विश्वास व्यक्त गरेको छ। साथै, यस सेवाबाट अन्य सरकारी निकायमा पनि ग्राहकको विवरण अद्यावधिक राख्न सहज हुने अपेक्षा गरिएको नेपाल टेलिकमका प्रवक्ता रविन्द्र मानन्धरले जानकारी दिएका छन्।