चितवन । चुनाव सम्पन्न नभईकनै मत सर्वेक्षणको नाममा नतिजा सार्वजनिक गरिएकोप्रति रेनु दाहाल ले आपत्ति जनाएकी छन्। केही सञ्चारमाध्यममा यस्ता सामग्री प्रसारण भएपछि उनले सामाजिक सञ्जाल फेसबुकमार्फत आफ्नो असन्तुष्टि व्यक्त गरेकी हुन्।

उनले मतदातालाई प्रभावित पार्ने उद्देश्यले निर्वाचन आचारसंहिताविपरीत भ्रामक समाचार सार्वजनिक गरिएकोप्रति गम्भीर ध्यानाकर्षण भएको बताएकी छन्। यस्ता कपोलकल्पित र भ्रमपूर्ण सामग्रीले समग्र निर्वाचन प्रक्रियामा नकारात्मक असर पार्न सक्ने भन्दै उनले सम्बन्धित सबैलाई जिम्मेवार र संवेदनशील बन्न आग्रह गरेकी छन्।
दाहाल नेपाल कम्युनिस्ट पार्टी (नेकपा) का तर्फबाट उम्मेदवार रहेकी छन्।

यस्तो छ उनको भनाइ
यतिबेला म चितवन क्षेत्र नं. ३ मा प्रतिनिधिसभाको उम्मेदवारका हैसियतले घरदैलो अभियानमा व्यस्त छु। यस क्रममा आम जनसमुदायबाट प्राप्त माया, विश्वास र समर्थनले मलाई अत्यन्त उत्साहित बनाएको छ।
भरतपुर महानगरपालिका मा ९ वर्षे कार्यकाल सम्पन्न गर्दै गर्दा, मेरो कामप्रतिको प्रतिबद्धता र इमान्दारिताकै कारण आज यस्तो अपार स्नेह पाउन सकेको अनुभूति गरेको छु।

निर्वाचनमा सहभागी भइसकेपछि जीत र हार दुवैलाई सहर्ष स्वीकार गर्नुपर्छ भन्नेमा म स्पष्ट छु। तथापि, मतदाताको विश्वास र साथका आधारमा फराकिलो मतान्तरले विजयी गराउनुहुनेछ भन्ने उच्च मनोबल पनि राखेको छु।

यसैबीच, मतदातालाई प्रभावित पार्ने उद्देश्यले मत सर्वेक्षणको नाममा निर्वाचन आचारसंहिताविपरीत केही सञ्चारमाध्यमबाट प्रसारित भ्रामक समाचारप्रति मेरो गम्भीर ध्यानाकर्षण भएको छ। यस्ता गतिविधिले समग्र निर्वाचन प्रक्रियालाई नै प्रभावित पार्ने हुँदा कपोलकल्पित र भ्रमपूर्ण सामग्री प्रकाशन/प्रसारण नगर्न सम्बन्धित सबैमा हार्दिक अनुरोध गर्दछु।

लोकतान्त्रिक मूल्य र मर्यादाको सम्मान गर्दै निष्पक्ष र स्वच्छ निर्वाचन सुनिश्चित गर्न सबैको साथ र सहयोगको अपेक्षा गर्दछु।