काठमाडौं । कलाकार तथा पत्रकारबीच आपसी सद्भाव, सहकार्य र स्वास्थ्य प्रवर्द्धन गर्ने उद्देश्यले सुकुण्डा फिल्म्स प्रोडक्सन प्रा.लि. द्वारा आयोजित “कलाकार तथा पत्रकारहरूको सुस्वास्थ्यको लागि” फुटसल प्रतियोगितामा नेपाल आदिवासी पत्रकार महासंघ (फोनिज) उपत्यका समन्वय विशेष समितिले उत्कृष्ट प्रदर्शन गर्दै प्रथम स्थान हासिल गरेको छ।

प्रतिस्पर्धात्मक खेलमा फोनिज उपत्यका समन्वय विशेष समितिका खेलाडीहरूले समन्वित टिमवर्क, उत्कृष्ट रणनीति र उच्च खेल भावना प्रदर्शन गर्दै उपाधि हात पारेका हुन्। प्रतियोगिताभर उनीहरूको अनुशासित खेल, तीव्र आक्रमण र मजबुत रक्षापंक्तिले दर्शकको ध्यान खिचेको थियो।

विजेता टिमलाई सम्मानसहित विजेता प्रमाणपत्र प्रदान गरिएको छ। कार्यक्रमका प्रमुख अतिथि लक्ष्मी महर्जन, नगर उप–प्रमुख महालक्ष्मी नगरपालिका ले प्रमाणपत्र हस्तान्तरण गर्दै खेलकुदले पेशागत व्यस्तताबीच स्वास्थ्य सन्तुलन कायम राख्न महत्वपूर्ण भूमिका खेल्ने बताउनुभयो।

आयोजक संस्थाका अध्यक्ष बासु साहीले कलाकार र पत्रकारबीच आत्मीय सम्बन्ध सुदृढ गर्न तथा स्वस्थ जीवनशैली प्रवर्द्धन गर्न यस्ता कार्यक्रमलाई निरन्तरता दिने प्रतिबद्धता व्यक्त गर्नुभयो।

फाल्गुन ९, २०८२ मा सम्पन्न उक्त प्रतियोगिताले पत्रकारिता र कला क्षेत्रका व्यक्तिहरूबीच नयाँ उत्साह र एकताको सन्देश दिएको सहभागीहरूले बताएका छन्। विजेता बनेका सम्पूर्ण फोनिजकर्मीलाई हार्दिक बधाई तथा आगामी दिनमा पनि निरन्तर सफलता हासिल गर्न शुभकामना व्यक्त गरिएको छ।