काठमाडौं । एन आई सी एशिया बैंक लिमिटेड ले आफ्नो स्वामित्वमा रहेका बैंकिङ्ग तथा गैर-बैंकिङ्ग सम्पत्ति र धितो सुरक्षणमा रहेका सम्पत्तिहरूको लिलाम बिक्री सम्बन्धी विस्तृत जानकारी उपलब्ध गराउन अनलाइन पोर्टल सञ्चालनमा ल्याएको छ।

बैंकले सार्वजनिक गरेको उक्त पोर्टलमार्फत लिलाम बिक्रीमा रहेका सम्पत्तिहरूको कित्ता नम्बर, क्षेत्रफल, फोटो, नक्सा तथा गुगल म्यापमार्फत स्थान पहिचान गर्न सकिने जानकारी उपलब्ध गराइएको बैंकले जनाएको छ। यसले ग्राहकहरूलाई सम्पत्तिको वास्तविक विवरण सहज रूपमा अनलाइनबाटै प्राप्त गर्न सहयोग गर्ने विश्वास बैंकले लिएको छ।

लिलाममा रहेका सम्पत्तिहरू खरिद गर्न इच्छुक ग्राहकहरूले पोर्टलमा उपलब्ध म्यासेज बक्समार्फत आफ्नो नाम, इमेल, मोबाइल नम्बर र ठेगाना उल्लेख गरी थप जानकारीका लागि बैंकसँग सम्पर्क गर्न सक्ने व्यवस्था समेत गरिएको छ।

बैंकका अनुसार उक्त पोर्टलमा नियमित रूपमा बैंकिङ्ग, गैर-बैंकिङ्ग तथा धितो सुरक्षणमा रहेका लिलाम बिक्री सम्बन्धी सम्पत्तिहरूको विवरण र अन्य आवश्यक सूचनाहरू अद्यावधिक गरिनेछ। यसबाट ग्राहकहरूले सहज, पारदर्शी र व्यवस्थित रूपमा लिलाम सम्बन्धी जानकारी प्राप्त गर्न सक्ने बैंकले जनाएको छ।