काठमाडौं । सिटिजन्स बैंक इन्टरनेसनल लिमिटेड र भारतस्थित मेदान्ता – द मेडिसिटी अस्पतालबीच बैंकका कार्डवाहक ग्राहकलाई उपचार सेवामा छुट प्रदान गर्ने सम्बन्धी समझदारीपत्र (MoU) नवीकरण गरिएको छ। नयाँ सम्झौतासँगै अब मेदान्ताका गुडगाउँसहित भारतका थप ६ अस्पतालमा पनि बैंकका ग्राहकले अधिकतम १५ प्रतिशतसम्म छुट सुविधा प्राप्त गर्ने भएका छन्।

यसअघि उक्त सुविधा केवल मेदान्ता, गुडगाउँमा मात्र उपलब्ध थियो। तर नयाँ सम्झौतापछि मेदान्ता नोएडा, मेदान्ता सुपर स्पेशलिटी अस्पताल लखनउ, जय प्रभा मेदान्ता सुपर स्पेशलिटी अस्पताल पटना, मेदान्ता सुपर स्पेशलिटी अस्पताल इन्दौर, मेदान्ता अब्दुर रज्जाक अन्सारी मेमोरियल वीभर्स अस्पताल राँची, र मेदान्ता अस्पताल राँचीका साथै ५ वटा मेडिक्लिनिकमा समेत यो सुविधा विस्तार गरिएको बैंकले जनाएको छ।

समझदारीपत्रमा बैंकका प्रमुख कार्यकारी अधिकृत गणेशराज पोखरेलले हस्ताक्षर गरेका हुन्। बैंकका अनुसार यस सहकार्यबाट भारतमा उपचार गराउन जाने ग्राहकले सहज, सुलभ र किफायती सेवा पाउँदै आएका छन्। बैंकले आगामी दिनमा पनि ग्राहकलाई थप लाभ प्रदान गर्ने उद्देश्यले सहकार्यलाई निरन्तरता दिएको जनाएको छ।

सिटिजन्स बैंकले हाल देशका ६१ जिल्लामा रहेका २०० शाखा, १६९ एटीएम, ३ विस्तारित काउन्टर र ४२ शाखारहित बैंकिङ इकाइमार्फत करिब १९ लाख ७६ हजार ग्राहकलाई सेवा प्रदान गर्दै आएको छ। बैंकले हालै विभिन्न डिजिटल सेवा, भर्चुअल क्रेडिट कार्ड तथा नयाँ बचत खातासमेत सञ्चालनमा ल्याएको छ।