धनगढी। नबिल बैंकको आयोजनामा कैलालीको धनगढीस्थित सेती प्रादेशिक अस्पतालमा सञ्चालन गरिएको निःशुल्क जलन उपचार शिविर सम्पन्न भएको छ। फागुन १२ देखि १४ गतेसम्म सञ्चालन भएको शिविरबाट ६५ जना जलनका बिरामी लाभान्वित भएका छन्।

शिविरमा आएका बिरामीमध्ये २० जनाको सेती प्रादेशिक अस्पतालमै विशेषज्ञ चिकित्सकद्वारा शल्यक्रिया गरिएको थियो भने जटिल प्रकृतिका १८ जनालाई थप उपचारका लागि काठमाडौंस्थित सुषमा कोइराला मेमोरियल अस्पतालमा रिफर गरिएको बैंकले जनाएको छ।

नबिल बैंक, सुषमा कोइराला मेमोरियल अस्पताल र सेती प्रादेशिक अस्पतालको संयुक्त आयोजनामा सञ्चालन भएको उक्त शिविरमा सुदूरपश्चिम प्रदेशका विभिन्न जिल्लाबाट आएका जलनपीडितले सेवा लिएका थिए। आर्थिक अवस्था कमजोर भएका तथा लामो समयदेखि उपचारको पहुँचबाहिर रहेका बिरामीलाई लक्षित गरी शिविर सञ्चालन गरिएको जनाइएको छ।

सुषमा कोइराला मेमोरियल अस्पतालका प्रा. डा. ईश्वर लोहनीको नेतृत्वमा विशेषज्ञ चिकित्सक टोलीले शिविरमा उपचार सेवा प्रदान गरेको थियो। उनका अनुसार सघन उपचार आवश्यक रहेका बिरामीलाई काठमाडौं रिफर गरिएको हो। उनले नेपालमा जलनसम्बन्धी समस्या अझै गम्भीर रहेको उल्लेख गर्दै समयमै उपचार नपाउँदा बिरामीको अवस्था जटिल बन्ने बताए।

शिविरमा सहभागीमध्ये ३५ पुरुष र ३० महिला रहेका थिए। नबिल बैंकका प्रमुख कार्यकारी अधिकृत मनोजकुमार ज्ञवालीले संस्थागत सामाजिक उत्तरदायित्वअन्तर्गत दुर्गम तथा विपन्न समुदायका जलनपीडितलाई लक्षित गरी शिविर सञ्चालन गरिएको बताए। उनले यस्ता कार्यक्रम आगामी दिनमा अन्य प्रदेशमा पनि विस्तार गरिने जानकारी दिए।

यसैबीच, शिविरसँगै सेती प्रादेशिक अस्पतालमा आधारभूत जलन उपचारसम्बन्धी तालिमसमेत सञ्चालन गरिएको थियो। उक्त तालिममा अस्पतालका चिकित्सक, नर्स तथा स्वास्थ्यकर्मी सहभागी भएका थिए। तालिमले जलनपछिको उपचार तथा व्यवस्थापनमा स्वास्थ्यकर्मीको क्षमता अभिवृद्धि हुने अपेक्षा गरिएको छ।