काठमाडौं। श्री स्टील्स लिमिटेडले निकट भविष्यमा सर्वसाधारणका लागि प्राथमिक शेयर (आईपीओ) निष्काशन गर्ने तयारी गरेको छ। कम्पनीले प्रचलित धितोपत्र दर्ता तथा निष्काशन सम्बन्धी नियमावली तथा धितोपत्र निष्काशन र बाँडफाँड सम्बन्धी निर्देशिकाबमोजिम नियमनकारी निकायबाट आवश्यक स्वीकृति प्राप्त गरेपछि आईपीओ जारी गर्ने जनाएको छ।

आईपीओ निष्काशन कार्यका लागि कम्पनीले बिक्री प्रबन्धकको रूपमा नबिल इन्भेष्टमेन्ट बैंकिङ्ग लिमिटेडलाई नियुक्त गरेको छ।

पूर्ण स्वचालित प्लान्टसहित सञ्चालनमा रहेको श्री स्टील्स लिमिटेड टिएमटी (TMT) रिबार उत्पादनमा विशेषज्ञ कम्पनी हो। भौगोलिक जटिलता र भूकम्पीय जोखिम रहेको नेपालमा बलिया तथा गुणस्तरीय संरचना निर्माण आवश्यक रहेकाले कम्पनीले अत्याधुनिक जापानी प्रविधिमा आधारित सिक्स–स्ट्यान्ड ब्लक मिलमार्फत उच्च गुणस्तरका रिबार उत्पादन गर्दै आएको जनाएको छ।

कम्पनीका अनुसार विश्वस्तरीय प्रविधिको प्रयोग गरी स्वदेशमै उत्कृष्ट उत्पादन गर्ने, निर्माण क्षेत्रका लागि आवश्यक फलाम तथा रडजन्य सामग्रीमा आत्मनिर्भरता बढाउने तथा रोजगारी सिर्जना गर्ने उद्देश्यसहित उद्योग सञ्चालन भइरहेको छ।

आईपीओ निष्काशनसम्बन्धी सम्झौतामा कम्पनीका प्रबन्ध सञ्चालक राजेश कुमार अग्रवाल र नबिल इन्भेष्टमेन्ट बैंकिङ्ग लिमिटेडका प्रमुख कार्यकारी अधिकृत मनिष नारायण जोशीले हस्ताक्षर गरेका छन्। उक्त सम्झौता कम्पनीका प्रमुख कार्यकारी अधिकृत सोमेश अग्रवालको रोहवरमा सम्पन्न भएको जानकारी दिइएको छ।