काठमाडौं । नेपाल राष्ट्र बैंक मा आजदेखि दुई डेपुटी गभर्नरको पद रिक्त भएको छ। फागुन २४ गतेदेखि डेपुटी गभर्नर नीलम ढुंगाना र बमबहादुर मिश्र ले नियमित अवकाश पाएपछि उक्त पद खाली भएको हो।

दुवै डेपुटी गभर्नर २०७७ फागुन २५ गते नियुक्त भएका थिए। राष्ट्र बैंकको व्यवस्था अनुसार डेपुटी गभर्नरको कार्यकाल पाँच वर्षको हुन्छ।

राष्ट्र बैंकको नियमअनुसार डेपुटी गभर्नर नियुक्त हुनुअघि व्यक्ति कार्यकारी निर्देशकका रूपमा कार्यरत हुनुपर्ने व्यवस्था छ। हाल राष्ट्र बैंकमा कार्यरत १८ जना कार्यकारी निर्देशक डेपुटी गभर्नरका सम्भावित प्रत्याशी बन्न योग्य छन्।

हाल तीमध्ये कसले डेपुटी गभर्नरको जिम्मेवारी पाउने भन्ने विषयमा कर्मचारी तथा अर्थनीतिकर्मीबीच व्यापक चर्चा भइरहेको छ।

डेपुटी गभर्नर नियुक्तिका लागि गभर्नरले कार्यकारी निर्देशकमध्येबाट चार जनाको नाम सिफारिस गरेर पठाउने व्यवस्था छ। त्यसपछि मन्त्रिपरिषद्ले सिफारिस गरिएका नाममध्येबाट दुई जनालाई नियुक्त गर्ने प्रावधान रहेको छ।

हाल राष्ट्र बैंकका कार्यकारी निर्देशकहरूमा नरेश शाक्य, रेवती नेपाल, रामु पौडेल, विश्रुत थापा, दयाराम शर्मा, गुरुप्रसाद पौडेल, किरण पण्डित, डा. सत्येन्द्र तिमल्सिना र चेतप्रसाद उप्रेती रहेका छन्।

त्यसैगरी रोशनकुमार सिग्देल, डा. रामशरण खरेल, डा. डिल्लीराम पोखरेल, दीर्घबहादुर रावल, निश्चल अधिकारी, अनुज दाहाल, दीपकराज लामिछाने, राजनविक्रम थापा र राजेन्द्र भट्टराई पनि कार्यकारी निर्देशकका रूपमा कार्यरत छन्।