काठमाडौं । बैंक तथा वित्तीय संस्था परिसंघ नेपाल (सिबिफिन) ले नेपाल राष्ट्र बैंकले सार्वजनिक गरेको आर्थिक वर्ष २०८३/८४ को मौद्रिक नीतिले वित्तीय क्षेत्र र निजी क्षेत्रलाई सकारात्मक सन्देश दिएको जनाएको छ।

शुक्रबार जारी विज्ञप्तिमा सिबिफिनले मौद्रिक नीतिले मूल्य स्थिरता, वित्तीय क्षेत्रको स्थायित्व, नियामकीय सरलीकरण तथा समग्र आर्थिक सन्तुलन कायम गर्ने दिशामा सन्तुलित दृष्टिकोण अपनाएको उल्लेख गरेको छ।

परिसंघका अनुसार रुग्ण उद्योगसँग सम्बन्धित निष्क्रिय कर्जाको व्यवस्थापन, दबाबमा रहेका कर्जाको पुनरुत्थान, नीतिगत दरहरू यथावत् राख्ने निर्णय, बैंक शाखा खोल्ने तथा बन्द गर्ने प्रक्रियामा लचकता, वित्तीय सेवाको डिजिटलाइजेसन, सञ्चालन खर्च न्यूनीकरण, विदेशी सरकारी ऋणपत्रमा लगानीको व्यवस्था तथा विदेशी मुद्रा व्यवस्थापनसम्बन्धी नीतिगत प्रावधानहरू सकारात्मक र दूरदर्शी छन्।

सिबिफिनले जोखिममा आधारित कर्जा नोक्सानी व्यवस्था, सुरक्षित कर्जाको जोखिमका आधारमा नोक्सानी व्यवस्था, पूँजी कोष पर्याप्ततासम्बन्धी नियामकीय सहजीकरण तथा अन्तर्राष्ट्रिय अभ्यासअनुरूप विवेकशील नियमन सुधारका विषयमा आफूले दिएका सुझाव भने यसपटक मौद्रिक नीतिमा समेटिन नसकेको जनाएको छ।

यद्यपि, नेपालको वर्तमान आर्थिक अवस्था, बैंकिङ क्षेत्रमा बढ्दो पूँजीगत दबाब, निष्क्रिय कर्जा व्यवस्थापन तथा निजी क्षेत्रमा कर्जा प्रवाहलाई प्रभावकारी बनाउन ती सुझावहरू आवश्यक रहेको उल्लेख गर्दै आगामी एकीकृत निर्देशनमार्फत नेपाल राष्ट्र बैंकले ती विषय सम्बोधन गर्ने अपेक्षा परिसंघले व्यक्त गरेको छ।

सिबिफिनले मौद्रिक नीतिको प्रभावकारी कार्यान्वयनमार्फत वित्तीय स्थायित्व कायम राख्न, बैंकिङ प्रणालीलाई थप सबल र प्रतिस्पर्धी बनाउन तथा निजी क्षेत्रको पुनरुत्थान र समग्र अर्थतन्त्रलाई गति दिन नेपाल राष्ट्र बैंक र नेपाल सरकारसँग निरन्तर सहकार्य र संवादमा रहने प्रतिबद्धता जनाएको छ।