काठमाडौँ । वायु प्रदूषण नियन्त्रण र वायु गुणस्तर सुधारका लागि विश्व बैंकले नेपाललाई सात अर्ब सात करोड २० लाख रुपैयाँ ऋण स्वीकृत गरेको छ।

वाशिङ्टन डीसीस्थित विश्व बैंकको प्रधान कार्यालयले सार्वजनिक गरेको प्रेस विज्ञप्तिअनुसार उक्त रकम “नेपाल क्लिन एयर एण्ड प्रस्पेरिटी प्रजेक्ट” कार्यान्वयनका लागि छुट्याइएको हो। परियोजना विशेषगरी काठमाडौँ उपत्यका र तराइका उच्च वायु प्रदूषण भएका क्षेत्रहरूमा सञ्चालन हुनेछ।

परियोजनाअन्तर्गत करिब ४०० औद्योगिक तथा व्यावसायिक उद्यमलाई धुँवारहित बनाउने लक्ष्य राखिएको छ। उद्योगहरूमा स्वच्छ प्रविधि प्रयोग, प्रदूषण नियन्त्रणका उपाय लागू गर्न र वातावरणमैत्री उत्पादन प्रणाली विकासमा सहयोग गरिनेछ।

विश्व बैंकका अनुसार यस परियोजनाले वायु प्रदूषण मात्र घटाउने होइन, आर्थिक गतिविधिलाई पनि वातावरणमैत्री बनाउनेछ। विशेष गरी उद्योग क्षेत्रबाट निस्कने धुँवा र हानिकारक कण कम गरी शहरी क्षेत्रका नागरिकको स्वास्थ्यमा सकारात्मक प्रभाव पार्ने अपेक्षा गरिएको छ।

परियोजना उद्योग, वाणिज्य तथा आपूर्ति मन्त्रालयको उद्योग विभाग मार्फत र वन तथा वातावरण मन्त्रालय तथा वातावरण विभागको समन्वयमा कार्यान्वयन गरिनेछ।

विश्व बैंकले नेपालमा बढ्दो वायु प्रदूषणलाई सार्वजनिक स्वास्थ्यका लागि गम्भीर चुनौती मान्दै, यस परियोजनाले स्वच्छ प्रविधि प्रवर्द्धन, प्रदूषण नियन्त्रण र वातावरणीय व्यवस्थापन सुदृढ गर्न सहयोग पुग्ने विश्वास व्यक्त गरेको छ।