काठमाडौं। सोपान फर्मास्युटिकल्स लिमिटेड ले आउँदो चैत ९ गतेदेखि प्रथम चरणमा वैदेशिक रोजगारीमा रहेका नेपालीहरूका लागि प्रारम्भिक सार्वजनिक निष्काशन (आईपीओ) खुला गर्ने भएको छ।

कम्पनीले प्रतिकित्ता १०० रुपैयाँ अंकित दरका कुल ४२ लाख ९० हजार कित्ता आईपीओ निष्काशन गर्न नेपाल धितोपत्र बोर्ड बाट फागुन १७ गते अनुमति प्राप्त गरेको हो। सो मध्ये पहिलो चरणमा ४ लाख २९ हजार कित्ता शेयर वैदेशिक रोजगारीमा रहेका नेपालीहरूका लागि निष्काशन गरिने कम्पनीले जनाएको छ।

कम्पनीले कुल आईपीओमध्ये २ लाख १४ हजार ५०० कित्ता सामूहिक लगानी कोषका लागि तथा १ लाख ७१ हजार ६०० कित्ता कम्पनीका कर्मचारीहरूका लागि सुरक्षित गरेको छ। बाँकी रहेको ३४ लाख ७४ हजार ९०० कित्ता शेयर दोस्रो चरणमा सर्वसाधारणका लागि निष्काशन गरिनेछ।

वैदेशिक रोजगारीमा रहेका नेपालीहरूले आईपीओमा आवेदन दिँदा न्यूनतम १० कित्ता र अधिकतम ११ हजार कित्तासम्म माग गर्न सक्नेछन्। आवेदन दिने अवधि चैत ९ गतेदेखि चैत १२ गतेसम्म तोकिएको छ।

कम्पनीको धितोपत्र निष्काशन तथा बिक्री प्रबन्धकको जिम्मेवारी एनएमबि क्यापिटल लिमिटेड ले सम्हाल्नेछ।