काठमाडौं । एन आई सी एशिया बैंक लिमिटेड ले लिलाम बिक्रीमा रहेका सम्पत्तिहरूको विस्तृत जानकारी उपलब्ध गराउन अनलाइन पोर्टल सार्वजनिक गरेको छ।

बैंकका अनुसार उक्त पोर्टलमार्फत बैंकिङ्ग, गैर–बैंकिङ्ग तथा धितो सुरक्षणमा रहेका सम्पत्तिहरूको लिलाम सम्बन्धी सम्पूर्ण विवरणहरू हेर्न सकिनेछ। ग्राहकहरूले लिलाम सूचना प्रकाशित विज्ञापनमा रहेको क्यूआर कोड स्क्यान गरी पोर्टलमा प्रवेश गरेर सम्पत्तिको कित्ता नम्बर, क्षेत्रफल, फोटो, नक्सा तथा गुगल म्यापमार्फत स्थानसम्बन्धी जानकारी प्राप्त गर्न सक्नेछन्।

यसैगरी, खरिद गर्न इच्छुक ग्राहकहरूले सम्बन्धित सम्पत्तिबारे थप जानकारी लिन पोर्टलमा उपलब्ध म्यासेज बक्समार्फत आफ्नो विवरण राखी बैंकसँग सम्पर्क गर्न सक्ने व्यवस्था गरिएको बैंकले जनाएको छ।

बैंकले उक्त पोर्टलमा लिलाममा रहेका सम्पत्तिहरू तथा सम्बन्धित सूचनाहरू नियमित रूपमा अद्यावधिक गरिने जानकारी दिएको छ। इच्छुक ग्राहकहरूले अनलाइन माध्यमबाटै सम्पत्तिको विस्तृत जानकारी लिएर लाभ लिन सक्ने विश्वास बैंकले व्यक्त गरेको छ।

बैंकका सहायक प्रमुख कार्यकारी अधिकृत एवं प्रमुख सूचना अधिकारी जयन्द्र रावल द्वारा जारी विज्ञप्तिमा उक्त जानकारी दिइएको हो।