काठमाडौं। प्रभु बैंक लिमिटेड ले ‘ग्लोबल मनी विक–२०२६’ को अवसरमा देशभर वित्तीय साक्षरता कार्यक्रम सम्पन्न गरेको छ। “सचेत बचत, सुरक्षित भविष्य” भन्ने मूल नाराका साथ सञ्चालन गरिएको कार्यक्रम चैत २ गतेदेखि सुरु भई चैत ८ गते सम्पन्न भएको हो।

बैंकले सातै प्रदेशमा रहेका आफ्ना २०० भन्दा बढी शाखामार्फत सप्ताहव्यापी रूपमा वित्तीय साक्षरता, बालबालिका तथा युवालक्षित चेतनामूलक कार्यक्रम र प्रभातफेरी आयोजना गरेको जनाएको छ।

कार्यक्रम अन्तर्गत बैंकले विद्यालय, कलेज, महिला समूह तथा विभिन्न समुदायमा आधुनिक बैंकिङ सेवा, बचतको महत्व, ऋण तथा लगानी, विद्युतीय बैंकिङ तथा त्यसमा अपनाउनुपर्ने सावधानीबारे जानकारी प्रदान गरेको थियो।

त्यसैगरी, बैंकले डिजिटल सुरक्षामा पनि जोड दिँदै अज्ञात स्रोतबाट आएका लिंक नखोल्न, संवेदनशील विवरण साझा नगर्न र अनलाइन ठगीबाट बच्न सचेतना फैलाएको छ। सामाजिक सञ्जालमार्फत पनि यस्ता सूचनाहरू निरन्तर प्रवाह गरिएको बैंकले जनाएको छ।

संस्थागत सामाजिक उत्तरदायित्व अन्तर्गत सञ्चालन गरिएको उक्त कार्यक्रम वाग्मती, गण्डकी, लुम्बिनी, कोशी, मधेश, कर्णाली र सुदूरपश्चिम प्रदेशका विभिन्न शाखाहरूबाट सञ्चालन गरिएको थियो।

हाल प्रभु बैंकले देशभर ३१२ शाखा, २८५ एटीएम र ६८ एक्सटेन्सन काउन्टरमार्फत करिब ३६ लाखभन्दा बढी ग्राहकलाई सेवा प्रदान गर्दै आएको छ। “विश्वास लिन्छौं, विश्वास दिन्छौं” भन्ने नारासहित बैंकले आधुनिक प्रविधिमार्फत गुणस्तरीय सेवा विस्तार गर्दै आएको जनाएको छ।