काठमाडौं। एसपीजी अटोमोबाइल्सले नेपालमा नयाँ विद्युतीय गाडी जेइको जे६टी औपचारिक रूपमा सार्वजनिक गरेको छ। एक विशेष कार्यक्रम आयोजना गर्दै कम्पनीले यो गाडी सार्वजनिक गरेको हो।

कम्पनीका अनुसार जे६टीलाई नेपाली सडकको अवस्थालाई ध्यानमा राख्दै तयार गरिएको छ। अफरोड र कठिन भू–भागमा पनि सहज रूपमा गुड्न सक्ने क्षमताका कारण यो गाडी विशेष मानिएको छ। यसको डिजाइन विश्वप्रसिद्ध ल्यान्ड रोभर डिफेन्डरबाट प्रभावित रहेको बताइएको छ, जसले यसलाई बलियो र आकर्षक बनाएको छ।

गाडीको बजार मूल्य ६८ लाख ९९ हजार रुपैयाँ तोकिएको भए पनि सुरुवाती अफर अन्तर्गत ग्राहकहरूले ६६ लाख ९९ हजार रुपैयाँमै खरिद गर्न सक्ने कम्पनीले जनाएको छ।

यसमा विश्वप्रसिद्ध सीएटीएल कम्पनीको लिथियम आइरन फस्फेट (LFP) ब्याट्री प्रयोग गरिएको छ। गाडीको ग्राउन्ड क्लियरेन्स २२५ एमएम रहेको छ, जसले नेपाली सडक र अफरोड दुबै अवस्थालाई सहज बनाउने कम्पनीको दाबी छ। पूर्ण चार्जमा यो गाडीले ४३१ किलोमिटर सम्म यात्रा गर्न सक्ने बताइएको छ।

सुविधाका हिसाबले पनि जे६टी आधुनिक प्रविधिले भरिपूर्ण छ। यसमा १५.६ इन्चको इन्फोटेन्मेन्ट स्क्रिन, ९.२ इन्च डिजिटल क्लस्टर, ५० वाट वायरलेस चार्जर, ८ स्पिकर, पानारोमिक सनरुफ, भेन्टिलेटेड तथा हिटेड सिट, डुअल जोन एसी लगायतका सुविधा समावेश छन्। साथै ३६० डिग्री क्यामेरा, लेभल–२ एडास, ६ एयरब्याग, भेइकल स्टेबिलिटी कन्ट्रोल र पार्किङ सेन्सर जस्ता सुरक्षा फिचरहरू पनि उपलब्ध छन्।

यसअघि बजारमा आएको जेइको जे६ को सफलतापछि यसको थप सुधारिएको र शक्तिशाली संस्करणका रूपमा जे६टी ल्याइएको कम्पनीले जनाएको छ।

कार्यक्रममा शारडा ग्रुपका प्रबन्ध निर्देशक सन्दीपकुमार शारडा र निर्देशक गौरव शारडा लगायत अटोमोबाइल क्षेत्रका विभिन्न व्यक्तित्वहरूको उपस्थिति रहेको थियो।

कम्पनीले नेपाली ग्राहकहरूलाई नवीन प्रविधि र भरपर्दो सवारी साधन उपलब्ध गराउने लक्ष्यसहित यो गाडी देशभरका आधिकारिक शोरुमहरूमा उपलब्ध गराएको जनाएको छ।