काठमाडौं। विश्व वित्तीय सप्ताह २०२६ (ग्लोबल मनी विक २०२६) को अवसरमा कामना सेवा विकास बैंकले विभिन्न वित्तीय साक्षरता कार्यक्रमहरू सफलतापूर्वक सम्पन्न गरेको छ। Organisation for Economic Co-operation and Development को संयोजनमा प्रत्येक वर्ष मार्च महिनामा मनाइने यस सप्ताह अन्तर्गत यस वर्ष मार्च १७ देखि मार्च २३ सम्म विभिन्न कार्यक्रमहरू सञ्चालन गरिएको थियो।

यस अवसरमा बैंकले विद्यालयस्तरमा वित्तीय साक्षरता अभिवृद्धि गर्ने उद्देश्यले देशैभरि प्रभावकारी कक्षा सञ्चालन गर्नुका साथै सामाजिक सञ्जालमार्फत विभिन्न सचेतनामूलक सामग्रीहरू प्रसारण गरेको छ।

बैंकले सातै प्रदेशका विभिन्न विद्यालयहरूमा कार्यक्रम सञ्चालन गर्दै १००० भन्दा बढी विद्यार्थीहरूलाई प्रत्यक्ष रूपमा लाभान्वित गरेको छ। कार्यक्रमहरूमा साना–साना बचतलाई एकीकृत गरी पूँजी निर्माण गर्ने तरिका, बचतको महत्व, व्यक्तिगत बजेट निर्माण, खर्च व्यवस्थापन तथा डिजिटल कारोबारका अवसर र चुनौतीहरूबारे जानकारी प्रदान गरिएको थियो।

त्यसैगरी, पछिल्लो समय बढ्दो डिजिटल ठगीका घटनालाई ध्यानमा राख्दै बैंकले ओटीपी (OTP) सम्बन्धी सचेतना अभिवृद्धि गर्न विशेष अभियान सञ्चालन गरेको छ। उक्त अभियान अन्तर्गत सामाजिक सञ्जालमार्फत विभिन्न भाषामा सचेतनामूलक भिडियो सामग्रीहरू प्रसारण गरिएको छ, जसले विभिन्न समुदायसम्म वित्तीय सुरक्षासम्बन्धी सन्देश प्रभावकारी रूपमा पुर्‍याउन सहयोग गरेको छ।

यसका साथै, बैंकले सुरक्षित भविष्यका लागि बचत गर्ने बानी विकास, बचत र लगानी, बजेट व्यवस्थापन, आकस्मिक अवस्थाका लागि कोषको तयारी, डिजिटल कारोबार गर्दा हुने गल्तीहरू तथा अनलाइन ठगीबाट बच्ने उपायहरूबारे समेत जानकारी प्रदान गरेको छ।

उक्त सप्ताहको अवसरमा बैंकले विभिन्न स्थानहरूमा वित्तीय साक्षरतासम्बन्धी प्रभातफेरी कार्यक्रमहरू पनि आयोजना गरेको थियो।

यसरी विभिन्न सचेतनामूलक कार्यक्रमहरू सञ्चालन गर्दै कामना सेवा विकास बैंकले ग्लोबल मनी विक २०२६ सफलतापूर्वक सम्पन्न गरेको जनाएको छ।