काठमाडौं । एनआईसी एशिया बैंक लिमिटेडले नयाँ वर्ष विक्रम संवत् २०८३ को अवसर पारेर नेपाली लोक बाजाको संरक्षण र प्रवर्द्धन गर्ने उद्देश्यसहित विशेष क्यालेन्डर सार्वजनिक गरेको छ।

बैंकले नयाँ वर्षको शुभकामना आदानप्रदानसँगै लोपोन्मुख तथा परम्परागत नेपाली लोक बाजामार्फत देशको सांस्कृतिक इतिहास र पहिचान उजागर गर्ने लक्ष्यसहित आकर्षक साजसज्जामा क्यालेन्डर सार्वजनिक गरेको जनाएको छ।

नेपाली लोक बाजा संग्रहालयको सहकार्यमा तयार पारिएको उक्त क्यालेन्डरमा देशका विभिन्न क्षेत्र, समुदाय तथा चाडपर्वमा प्रयोग हुने धार्मिक, सांस्कृतिक, सामाजिक र ऐतिहासिक महत्व बोकेका बाजा तथा तिनको बजाउने शैली झल्किने तस्बिरहरू समावेश गरिएको छ।

बैंकका अनुसार भित्ते तथा टेबल दुवै प्रकारका क्यालेन्डर आधिकारिक वेबसाइटमार्फत सार्वजनिक गरिएको छ, जसलाई ग्राहक तथा सर्वसाधारणले सजिलै डाउनलोड गर्न सक्ने व्यवस्था गरिएको छ। क्यालेन्डरमा नेपाल सरकारद्वारा प्रकाशित राजपत्रअनुसारका सार्वजनिक बिदा, चाडपर्व, विभिन्न दिवस तथा पञ्चांग तिथिहरू समेत समावेश गरिएको बैंकले जनाएको छ।

यस पहलले नेपाली लोक बाजा तथा सांस्कृतिक सम्पदाको संरक्षण, प्रवर्द्धन र पुस्तान्तरणमा सकारात्मक योगदान पुग्ने विश्वास बैंकले व्यक्त गरेको छ।

बैंकका सहायक प्रमुख कार्यकारी अधिकृत तथा प्रमुख सूचना अधिकारी जयन्द्र रावलले नयाँ वर्ष २०८३ ले सम्पूर्ण ग्राहक तथा सरोकारवालामा नयाँ आशा, भरोसा र उत्साह थप्ने अपेक्षा व्यक्त गरेका छन्।