काठमाडौं। नेपाल टेलिकमले निकट भविष्यमा थ्रीजी सेवा क्रमशः बन्द गर्दै फोरजी सेवामा रूपान्तरण गर्ने प्रक्रिया सुरु गरेको जनाएको छ।

कम्पनीका अनुसार हाल थ्रीजी सिम प्रयोग गरिरहेका ग्राहकलाई सिम परिवर्तन गर्न भ्वाइस कल तथा एसएमएसमार्फत सूचना पठाइएको छ। ग्राहकहरूले आफ्नो पुरानो सिमलाई निःशुल्क रूपमा फोरजी सिममा परिवर्तन गर्न सक्नेछन्।

सिम परिवर्तनका लागि सेवाग्राहीले नजिकको दूरसञ्चार कार्यालयमा गई नागरिकता, राष्ट्रिय परिचयपत्र, राहदानी वा सवारी चालक अनुमतिपत्रजस्ता आधिकारिक परिचयपत्र देखाउनुपर्नेछ।

नेपाल टेलिकमले थ्रीजी प्रयोगकर्तालाई छिटो फोरजीमा रूपान्तरण गर्ने अभियानलाई तीव्र बनाएको जनाएको छ। फोरजी प्रविधिले उच्च इन्टरनेट गति तथा राम्रो सेवा गुणस्तर उपलब्ध गराउने भएकाले ग्राहकलाई प्रत्यक्ष लाभ पुग्ने विश्वास कम्पनीले लिएको छ।

यसका साथै ग्राहकहरूले आफ्नो सिम फोरजी हो वा होइन भन्ने जानकारी लिन र सेवा सक्रिय गर्न ४४४३ नम्बर डायल गर्न सक्नेछन्। साथै उच्च गुणस्तरको भोल्टे (VoLTE) सेवा समेत सजिलै सक्रिय गर्न सकिने बताइएको छ।