बाजुरा । नियमित खोप सेवाबाट छुटेका बालबालिकालाई खोजी र खोप अभियान सञ्चालन गर्न बाजुराको गौमुल गाउँपालिकाले सक्रिय कदम चालेको छ । गाउँपालिकाले ६ वटै वडामा पुगेर छुटेका बालबालिकाको पहिचान गरी सर्वेक्षण सुरु गरेको जनाएको छ ।

स्वास्थ्य शाखा प्रमुख हरिश विकका अनुसार, पालिकाका १० वटा स्वास्थ्य संस्थाबाट एक–एक जना स्वास्थ्यकर्मी खटाएर अभियान सञ्चालन गरिएको छ।

अभियानको मुख्य उद्देश्य विभिन्न कारणले खोपबाट वञ्चित बालबालिकालाई पहिचान गरी खोपको दायरामा ल्याउनु रहेको छ । यो अभियान यही चैत मसान्तसम्म सञ्चालन हुने जनाएको छ ।

छिमेकी भारत जाने परिवारका बालबालिकाहरू खोप कार्ड नहुँदा वञ्चित हुने गरेका छन् । गत वर्ष यहाँ २ बालबालिका छुटेका थिए, तर यस वर्ष हालसम्म त्यस्ता बालबालिका भेटिएका छैनन् ।

गाउँपालिकाका प्रमुख प्रशासकीय अधिकृत जगदीश प्रसाद भट्टका अनुसार, २०८३ वैशाख मसान्तभित्रै गाउँपालिकामा पूर्ण खोप सुनिश्चितता गर्ने लक्ष्यका साथ सर्वेक्षण अभियानलाई तीव्रता दिइएको छ । प्रत्येक वडामा स्वास्थ्यकर्मीको टोली खटाएर नियमित खोपबाट छुटेका बालबालिकाको तथ्याङ्क सङ्कलन भइरहेको छ ।