काठमाडौं । JSW MG Motor India को नेपालका लागि आधिकारिक वितरकको रूपमा GO Automobiles नियुक्त भएको छ। गोल्छा अर्गनाइजेशन अन्तर्गत सञ्चालित जीओ अटोमोबाइल्सले नेपालमा एमजीका विद्युतीय सवारीसाधन (ईभी) औपचारिक रूपमा लन्च गरेको हो।

यस रणनीतिक वितरण साझेदारीसँगै काठमाडौंको Thapathali मा नयाँ एमजी डिलरशिप सञ्चालनमा आएको कम्पनीले जनाएको छ। कम्पनीका अनुसार यो सहकार्यले नेपाली बजारमा एमजी ब्रान्डको उपस्थितिलाई थप व्यवस्थित, सशक्त र ग्राहककेन्द्रित बनाउनेछ।

नयाँ शोरुममा MG Comet EV र MG Windsor EV लगायतका मोडलहरू उपलब्ध रहेका छन्। कम्पनीले विभिन्न सेग्मेन्टका ग्राहकहरूको फरक–फरक मोबिलिटी आवश्यकतालाई ध्यानमा राखेर यी मोडलहरू उपलब्ध गराइएको जनाएको छ।

एमजीले यस साझेदारीमार्फत आफ्ना गाडीहरू ग्राहकसम्म अझ सहज पहुँचमा पुर्‍याउनुका साथै देशभर बिक्रीपछिको सेवा र सुविधालाई थप प्रभावकारी बनाउने लक्ष्य राखेको बताएको छ। कम्पनीका अनुसार बलियो स्थानीय उपस्थिति र प्रभावकारी ग्राहक सहयोगमार्फत ग्राहकलाई भरपर्दो स्वामित्व अनुभव प्रदान गरिनेछ।

नेपालका लागि डिलर प्रिन्सिपल Akash Golchha ले जेएसडब्लु एमजी मोटर इन्डियासँगको सहकार्यलाई महत्वपूर्ण अवसरको रूपमा वर्णन गरेका छन्। उनले आधुनिक पूर्वाधार र उत्कृष्ट ग्राहक सेवामा केन्द्रित भएर डिलरशिप तयार गरिएको बताए।

उनका अनुसार प्रविधि, आधुनिक डिजाइन र दिगोपनको संयोजन रहेको एमजीको पोर्टफोलियो नेपाली ग्राहकहरूको चाहना र आकांक्षासँग मेल खानेछ। साथै नेपाली बजारमा एमजी ब्रान्डको दीर्घकालीन र बलियो उपस्थिति निर्माण गर्ने लक्ष्य रहेको उनले बताए।

जीओ अटोमोबाइल्सले सीमित अवधिका लागि एमजीका गाडीहरूमा विशेष प्रारम्भिक मूल्यसमेत घोषणा गरेको छ। यसअनुसार एमजी कमेट ईभीको प्रारम्भिक मूल्य १८ लाख ७५ हजार रुपैयाँ तथा एमजी विन्डसर ईभीको मूल्य ३९ लाख ७५ हजार रुपैयाँ तोकिएको छ। कम्पनीका अनुसार ग्राहकहरूले कम्प्याक्ट शहरी ईभीदेखि प्रिमियम एसयूभीसम्मका विभिन्न विकल्प रोज्न सक्नेछन्।

कम्पनीले यो लन्चसँगै नेपालमा एमजी ब्रान्डको नयाँ अध्याय सुरु भएको जनाएको छ। नवप्रवर्तन, दिगोपन र आधुनिक डिजाइनलाई प्राथमिकता दिँदै एमजीले नेपालको मोबिलिटी क्षेत्रलाई नयाँ दिशा दिने लक्ष्य राखेको बताएको छ।
SAIC Motor र JSW Group ले सन् २०२३ मा संयुक्त साझेदारीमार्फत जेएसडब्लु एमजी मोटर इन्डिया स्थापना गरेका हुन्। एमजी ब्रान्ड सन् १९२४ मा बेलायतमा स्थापना भएको मोरिस ग्यारेजेसको रूपमा विश्वभर परिचित रहेको छ।