काठमाडौं। नेपाल र खल्ती सुरक्षाले संयुक्त रूपमा ‘सुरक्षा ३६०’ नामक डिजिटल बीमा योजना सार्वजनिक गरेका छन्। यो सेवा Khalti एपमार्फत उपलब्ध हुने भएकाले बीमा प्रक्रिया अझ छिटो र सरल हुने कम्पनीले जनाएको छ।

नयाँ योजनाअन्तर्गत प्रयोगकर्ताले मोबाइल एपमा केही आधारभूत विवरण भरेर केही मिनेटमै बीमा खरिद गर्न सक्नेछन्। यसले कागजी प्रक्रिया घटाउँदै डिजिटल माध्यमबाट बीमा सेवा पहुँचयोग्य बनाउने लक्ष्य राखेको छ।

‘सुरक्षा ३६०’ ले जीवन बीमा, दुर्घटनाबाट हुने मृत्यु तथा स्थायी अशक्तता सुरक्षा, गम्भीर रोग बीमा र दुर्घटनाजन्य उपचार खर्च जस्ता सुविधाहरू एउटै प्याकेजमा समेटेको छ।

यो योजना सिल्वर, गोल्ड र प्लाटिनम गरी तीन विकल्पमा उपलब्ध छ। बीमा कभरेज रु. २३ लाखदेखि रु. ४६ लाखसम्म रहेको छ भने वार्षिक प्रिमियम रु. ३,८१० बाट सुरु हुन्छ। यो योजना १८ देखि ५० वर्ष उमेर समूहका प्रयोगकर्ताका लागि लक्षित गरिएको छ।

कम्पनीका अनुसार डिजिटल बीमा सेवामार्फत वित्तीय सुरक्षा अझ सहज र व्यापक बनाउने उद्देश्य राखिएको छ।