काठमाडौं । लक्ष्मी सनराइज बैंकले विश्व बैंक समूहअन्तर्गतको निजी क्षेत्रीय संस्था अन्तर्राष्ट्रिय वित्त निगम (IFC) सँग ‘महिलामा बैंकिङ (Banking on Women)’ पहलअन्तर्गत ग्लोबल महिला सूक्ष्म, साना तथा मझौला उद्यम (WMSMEs) सम्बन्धी लैङ्गिक आधारमा विभाजित तथ्यांक (Sex Disaggregated Data – SDD) सहकार्य सम्झौता गरेको छ। उक्त कार्यक्रमलाई महिलाको उद्यमशीलता प्रवर्द्धनका लागि स्थापित बहुपक्षीय अन्तर्राष्ट्रिय पहल ‘महिला उद्यमी वित्त पहल (Women Entrepreneurs Finance Initiative – We-Fi)’ ले सहयोग गरिरहेको छ।

We-Fi विश्वभर महिला नेतृत्व तथा स्वामित्वमा रहेका साना तथा मझौला उद्यमहरूलाई लगानी तथा वित्तीय पहुँच विस्तार गर्ने उद्देश्यले स्थापना गरिएको बहुदाता अन्तर्राष्ट्रिय मञ्च हो। यसअन्तर्गत सञ्चालन हुने ‘महिला उद्यमी वित्त कोड (Women Entrepreneurs Finance Code – WE-Finance Code)’ वित्तीय संस्था, नियामक निकाय तथा वित्तीय प्रणालीसँग आबद्ध सरोकारवालाबीचको साझा प्रतिबद्धता हो, जसले महिला उद्यमीलाई आवश्यक वित्तीय स्रोत उपलब्ध गराई आर्थिक वृद्धि र रोजगारी सिर्जनामा योगदान पुर्‍याउने लक्ष्य राख्दछ।

यस सम्बन्धी सम्झौतामा लक्ष्मी सनराइज बैंकका तर्फबाट कार्यवाहक प्रमुख कार्यकारी अधिकृत सुमेद भट्टराई तथा अन्तर्राष्ट्रिय वित्त निगम (IFC) का दक्षिण एसिया क्षेत्रीय प्रबन्धक (वित्तीय संस्था समूह – अपस्ट्रिम तथा परामर्श) मेहदी चेरकाउईले हस्ताक्षर गरेका थिए।

यस सहकार्यअन्तर्गत IFC ले बैंकलाई लैङ्गिक आधारमा विभाजित तथ्यांक (SDD) को संकलन, विश्लेषण तथा उपयोग प्रक्रिया सुदृढ बनाउन सहयोग गर्नेछ। यसले महिला स्वामित्वमा रहेका साना तथा मझौला उद्यमहरू (WSMEs) का आवश्यकता, चुनौती तथा अवसरबारे बुझाइ विकास गर्न मद्दत गर्नेछ। यसका आधारमा बैंकले महिला उद्यमीहरूका लागि अझ प्रभावकारी तथा उपयुक्त वित्तीय समाधानहरू विकास गर्न सक्नेछ।

यो सहकार्यले जिम्मेवार बैंकिङ अभ्यासप्रति लक्ष्मी सनराइज बैंकको प्रतिबद्धतालाई थप मजबुत बनाएको छ। बैंकले यस साझेदारीमार्फत महिला उद्यमशीलता प्रवर्द्धन तथा समावेशी आर्थिक विकासमा अर्थपूर्ण योगदान पुर्‍याउने अपेक्षा गरेको छ।