काठमाडौँ । युवाहरूको नवप्रवर्तनशील सोचलाई राष्ट्रिय विकाससँग जोड्ने उद्देश्यले आयोजित ‘नेपाल स्टार्टअप इनोभेसन ह्याकाथन २०२६’ सफलतापूर्वक सम्पन्न भएको छ। Glocal Pvt. Ltd. द्वारा आयोजित तीन दिने कार्यक्रममा देशभरका विद्यार्थीहरूले विभिन्न राष्ट्रिय चुनौती समाधानका लागि नवीन अवधारणा र प्रोटोटाइप प्रस्तुत गरेका थिए।

‘नेपालका लागि नवप्रवर्तन: राष्ट्रिय चुनौतीका लागि स्थानीय समाधान’ भन्ने नारासहित आयोजित ह्याकाथनमा २१८ आवेदनमध्ये १७ उत्कृष्ट टोली छनोट भएका थिए। सहभागीमध्ये ५७ प्रतिशत कलेज तहका र ४३ प्रतिशत माध्यमिक विद्यालय तहका विद्यार्थी रहेका थिए।

कार्यक्रममा Kathmandu उपत्यकासहित Dhangadhi, Butwal, Janakpur, Birgunj, Biratnagar र Surkhet लगायतका विभिन्न सहरबाट सहभागीहरूको उपस्थिति रहेको थियो।

७२ घण्टासम्म सञ्चालन भएको ह्याकाथनमा ८ भन्दा बढी उद्योग विज्ञहरूले सहभागी टोलीलाई मेन्टरसिप प्रदान गरेका थिए। कार्यक्रम डिजिटल समावेशीकरण, जलवायु परिवर्तन, शिक्षा, कृषि, पर्यटन, उद्यमशीलता र स्वास्थ्यलगायत सात प्रमुख विषयमा केन्द्रित थियो।

ह्याकाथनको अन्तिम दिन १७ टोलीहरूले आफ्ना परियोजना निर्णायक मण्डलसमक्ष प्रस्तुत गरेका थिए। अनलाइन शिक्षामा “प्रुफ अफ वर्क” को अभाव र न्यून संलग्नताको समस्या समाधान गर्ने उद्देश्यले “Leapnode” प्लेटफर्म निर्माण गर्ने TEAM NOVA विजेता बनेको छ। टोलीले रु ५० हजार नगद पुरस्कार प्राप्त गरेको आयोजकले जनाएको छ।

Leapnode परियोजनाको विकासमा प्रशान्त दाश, राहुल सिंह, समीन थापा, शैल मल्ल र रामकृष्ण भण्डारीलगायत सदस्यहरूको योगदान रहेको थियो। आयोजकका अनुसार उक्त समाधान प्राविधिक रूपमा सक्षम र बजारमुखी रहेको छ।