काठमाडौँ । नेपालको अग्रणी ब्याट्री उत्पादक एशियन ब्याट्री लिमिटेड ले राष्ट्रिय क्रिकेट टोलीका चर्चित खेलाडी दिपेन्द्र सिंह ऐरी लाई आफ्नो आधिकारिक ब्राण्ड एम्बेसडर नियुक्त गरेको छ ।

यससँगै कम्पनीले ‘भोल्टेक्स’ सिरिज अन्तर्गतका नयाँ ब्याट्रीहरू समेत औपचारिक रूपमा सार्वजनिक गरेको छ ।

काठमाडौंस्थित होटल याक एण्ड यती मा आयोजित विशेष कार्यक्रममा देशभरका ४०० भन्दा बढी डिलर, रिटेलर तथा व्यावसायिक साझेदारहरूको सहभागिता रहेको थियो । कम्पनीले कार्यक्रमलाई आफ्नो ब्राण्ड विस्तार तथा नयाँ रणनीतिक यात्राको महत्वपूर्ण चरणका रूपमा प्रस्तुत गरेको जनाएको छ ।

कम्पनीका अनुसार ‘भोल्टेक्स’ सिरिज सम्पूर्ण उत्पादनमा एकरूपता कायम गर्ने, ब्राण्ड पहिचानलाई थप सशक्त बनाउने तथा गुणस्तर अभिवृद्धि गर्ने उद्देश्यका साथ बजारमा ल्याइएको हो । आधुनिक प्रविधि, टिकाउपन र उत्कृष्ट कार्यक्षमतामा आधारित यो सिरिजले नेपाली अटोमोबाइल बजारमा नयाँ मापदण्ड स्थापित गर्ने विश्वास कम्पनीले व्यक्त गरेको छ ।

कार्यक्रममा बोल्दै दिपेन्द्र सिंह ऐरीले गुणस्तरीय नेपाली ब्राण्ड एशियन ब्याट्रीसँग सहकार्य गर्न पाउँदा आफू गौरवान्वित भएको बताउनुभयो । उहाँले नेपाली उत्पादनप्रतिको उपभोक्ताको विश्वास दिनप्रतिदिन बढ्दै गएको उल्लेख गर्दै एशियन ब्याट्रीले उद्योग क्षेत्रमा बनाएको पहिचान प्रशंसनीय रहेको धारणा राख्नुभयो ।

कार्यक्रमका क्रममा कम्पनीको ब्राण्ड विकास, बजार विस्तार तथा बिक्री प्रवर्द्धनमा महत्वपूर्ण योगदान पुर्‍याउने विभिन्न रिटेलर तथा डिष्ट्रिब्युटरलाई विशेष अवार्ड तथा सम्मान प्रदान गरिएको थियो । कम्पनीले आफ्ना व्यावसायिक साझेदारहरूको योगदानलाई सफलताको मुख्य आधारका रूपमा व्याख्या गरेको थियो ।

कम्पनीका अध्यक्ष सुरेश लोहनीले नेपाली अटोमोबाइल क्षेत्रमा एशियन ब्याट्रीले उल्लेखनीय योगदान दिँदै आएको बताउनुभयो । उहाँका अनुसार गुणस्तर, विश्वसनीयता तथा बिक्रीपछिको सेवाप्रतिको दृढ प्रतिबद्धताकै कारण कम्पनीले बजारमा सफलता हासिल गरेको हो ।

उहाँले अटोमोटिभ क्षेत्रमा नयाँ सम्भावना सिर्जना गर्दै कम्पनीले निरन्तर नवीन प्रविधिमा आधारित उत्पादनहरू ल्याउने योजना रहेको जानकारी दिनुभयो ।

एशियन ब्याट्रीले बजाज, हिरो, सेभ्रोलेट, फोर्ड, होण्डा र इसुजुजस्ता अन्तर्राष्ट्रिय अटोमोबाइल ब्राण्डलाई आफ्ना उत्पादन उपलब्ध गराउँदै आएको जनाएको छ । विराटनगरस्थित उत्पादन केन्द्र तथा काठमाडौँस्थित कर्पोरेट कार्यालयमार्फत कम्पनीले अन्तर्राष्ट्रियस्तरको उत्पादन प्रणाली अपनाएर काम गरिरहेको जनाएको छ ।

कम्पनीका अनुसार प्रत्येक ब्याट्रीलाई बजारमा ल्याउनुअघि कडा परीक्षण प्रक्रियाबाट गुजारिने भएकाले उत्पादन टिकाउ, भरपर्दो र उच्च कार्यक्षमतायुक्त हुने गरेका छन् । साथै, देशभर फैलिएको सेवा सञ्जालमार्फत ग्राहकलाई बिक्रीपछिको सेवा तथा प्राविधिक सहयोग प्रदान गर्दै आएको कम्पनीले जनाएको छ ।

स्वदेशी उद्योगका रूपमा सुरु भएको एशियन ब्याट्रीले अहिले अन्तर्राष्ट्रिय बजारतर्फ समेत आफ्नो उपस्थिति विस्तार गरिरहेको छ । ‘मेड इन नेपाल’ उत्पादनलाई विश्व बजारसम्म पुर्‍याउने लक्ष्यसहित कम्पनीले आफ्नो पहिचानलाई थप बलियो बनाउँदै लगेको जनाएको छ ।