काठमाडौँ । ‘द हिडन ट्रेजर मिस नेपाल २०२६’ को मुख्य प्रायोजक काजरिया रमेश टाइल्स लिमिटेड ले आफ्ना ग्राहकलाई लक्षित गर्दै विशेष उपभोक्ता योजना ‘डाइन विथ द डिभाज – एन इभिनिङ विथ मिस नेपाल’ अभियान सार्वजनिक गरेको छ ।

नयाँ मिस नेपालको खोजीका लागि देशभर सञ्चालन भइरहेका क्षेत्रीय अडिसनसँगै सुरु गरिएको यस अभियानअन्तर्गत अडिसन हुने प्रमुख सहरका ग्राहक दम्पतीहरूले बहालवाला मिस नेपालहरूसँग विशेष डिनर गर्ने अवसर प्राप्त गर्नेछन् ।

कम्पनीका अनुसार अभियानमा सहभागी हुन ग्राहकले योजनाको अवधिभित्र एकै पटकको खरिदमा कम्तीमा १ हजार वर्ग फिट काजरिया टाइल्स खरिद गरेको हुनुपर्नेछ ।

यो योजना मिस नेपालको क्षेत्रीय अडिसन भइरहेका सात प्रमुख सहरमा लागू गरिएको छ । ती सहरमा नेपालगञ्ज, बिर्तामोड, इटहरी, पोखरा, बुटवल, जनकपुर र काठमाडौँ रहेका छन् ।

अभियानबारे जानकारी दिँदै कम्पनीका प्रवक्ताले मिस नेपालसँगको साझेदारीले भव्यता, आधुनिकता र उत्कृष्टताको उत्सवलाई प्रतिनिधित्व गर्ने बताउनुभयो । उहाँले ‘डाइन विथ द डिभाज’ अभियानमार्फत यही अनुभव ग्राहकसम्म प्रत्यक्ष रूपमा पुर्‍याउन खोजिएको उल्लेख गर्नुभयो ।

उहाँका अनुसार घर तथा भवन सजावटका लागि काजरिया रोज्ने ग्राहकप्रति कृतज्ञता व्यक्त गर्दै अविस्मरणीय जीवनशैली अनुभव प्रदान गर्ने उद्देश्यले योजना ल्याइएको हो ।

यो अभियान सन् २०२६ मे २४ देखि जुन ८ अर्थात् २०८३ जेठ १० देखि जेठ २५ गतेसम्म सञ्चालन हुनेछ । योजना अन्तर्गतको सुविधा तोकिएको अवधिभित्र गरिएको एकल बिलिङ कारोबारमा मात्र लागू हुने कम्पनीले जनाएको छ ।

थप जानकारीका लागि ग्राहकले नजिकैको आधिकारिक काजरिया शोरुममा सम्पर्क गर्न वा कम्पनीका आधिकारिक सामाजिक सञ्जालमार्फत जानकारी लिन सक्नेछन् ।

नेपालमै अत्याधुनिक प्रविधियुक्त टाइल्स उत्पादन उद्योग सञ्चालन गर्दै आएको काजरिया रमेश टाइल्सले स्वदेशी टाइल उद्योगलाई नयाँ उचाइमा पुर्‍याएको दाबी गरेको छ । कम्पनीले अन्तर्राष्ट्रियस्तरमा ‘सुपरब्रान्ड २०२५’, ‘एसियाज मोस्ट प्रमिसिङ ब्रान्ड’ लगायतका मान्यता प्राप्त गरिसकेको जनाएको छ ।

कम्पनीका अनुसार उसले गुणस्तर तथा वातावरणमैत्री उत्पादनमा विशेष ध्यान दिँदै आइएसओ ९००१ः२०१५ र आइएसओ १४००१ः२०१५ प्रमाणपत्र प्राप्त गरेको छ । साथै, इन्डियन ग्रिन बिल्डिङ काउन्सिलको सदस्यसमेत रहेको कम्पनी हालै ‘एनएस क्वालिटी अवार्ड २०२६’ बाट पनि सम्मानित भएको जनाएको छ ।

हाल नेपालभर १०० भन्दा बढी शोरुममार्फत सेवा दिइरहेको काजरियाले ३ हजारभन्दा बढी डिजाइनका टाइल्स बजारमा उपलब्ध गराउँदै आएको छ । कम्पनीका उत्पादनमा ग्लेज्ड भिट्रिफाइड टाइल्स, सेरामिक वाल टाइल्स तथा हेभी ड्युटी भिट्रिफाइड टाइल्स समावेश छन् ।