काठमाडौं। नेपाल एसबीआई बैंक लिमिटेडले अन्तर्राष्ट्रिय योग दिवस २०२६ को अवसरमा सातै प्रदेशमा योग तथा स्वास्थ्यसम्बन्धी कार्यक्रम आयोजना गरी दिवस मनाएको छ।

बैंकका कर्मचारीहरूले विभिन्न प्रदेशमा आयोजित योग तथा स्वास्थ्य प्रवर्द्धनसम्बन्धी गतिविधिमा उत्साहपूर्वक सहभागिता जनाएका थिए। बैंकले कर्मचारीहरूको समग्र स्वास्थ्य, शारीरिक तन्दुरुस्ती, मानसिक सुदृढता तथा स्वस्थ कार्य–जीवन सन्तुलन प्रवर्द्धन गर्ने उद्देश्यले कार्यक्रम आयोजना गरेको जनाएको छ।

योग अभ्यासमार्फत कर्मचारीहरूलाई सद्भाव, आत्मअनुशासन, मानसिक शान्ति तथा समग्र स्वास्थ्यप्रति सचेत बनाउने प्रयास गरिएको बैंकले जनाएको छ। काठमाडौंमा आयोजित कार्यक्रममा बैंकका प्रबन्ध सञ्चालक तथा प्रमुख कार्यकारी अधिकृत रामकुमार तिवारीको नेतृत्वमा व्यवस्थापन टोली, वरिष्ठ पदाधिकारी तथा १५० भन्दा बढी कर्मचारीहरूको सक्रिय सहभागिता रहेको थियो।

बैंकका अनुसार यस्ता कार्यक्रमले कर्मचारीहरूको स्वास्थ्य, संलग्नता तथा उत्पादकत्व अभिवृद्धि गर्दै सकारात्मक र जीवन्त कार्यस्थल संस्कृतिको विकासमा योगदान पुग्ने विश्वास गरिएको छ।

नेपाल एसबीआई बैंकले विगत ३२ वर्षदेखि बैंकिङ सेवा प्रदान गर्दै आएको छ। हाल बैंकले देशभर १०३ शाखा, २२ एक्सटेन्सन काउन्टर, सात प्रदेश कार्यालय, २१ शाखारहित बैंकिङ सेवा, १२७ एटीएम तथा एक कर्पोरेट कार्यालयमार्फत सेवा प्रदान गरिरहेको छ।