काठमाडौँ । नेपाल शैक्षिक परामर्श संघ (इक्यान)ले बृहत शैक्षिक मेला आयोजना गर्ने परम्परालाई निरन्तरता दिदै यस वर्ष पनि मेलाको १५ औ संस्करण भव्यताका साथ आयोजना गर्ने भएको छ ।

इक्यानले राजधानीमा पत्रकार सम्मेलन गरेर कोरोना महामारीपछि पहिलो पटक भौतिक रूपमा एक दिनको लागि बानेश्वरस्थित एभरेष्ट होटलमा असोज १३ गते ‘१५औँ इक्यान मल्टि डेस्टिनेसन एजुकेशनल फेयर, २०२४’ आयोजना हुने जानकारी दिएको छ ।

इक्यानका अध्यक्ष शेषराज भट्टराईले कोरोना महामारीपछि पहिलो पटक भौतिक रूपमा शैक्षिक मेला आयोजना गर्न लागिएको जानकारी दिए ।

‘नेपाली विद्यार्थीहरूलाई स्वदेशी एवम् विदेशी शिक्षा प्रणाली, प्राप्त योग्यताको भावी सम्भावना र असरबारे पर्याप्त सूचना प्रवाह, शैक्षिक संस्थामा प्राप्त हुनसक्ने छात्रवृत्ति, सुविधा तथा जानकारी एवम् परामर्श सेवा प्रदान गर्ने उद्देश्यले मेला आयोजना गर्न लागिएको हो,’ उनले भने ।

अध्यक्ष भट्टराईले विद्यार्थीको उच्च शिक्षाको सपना साकार गर्न शैक्षिक मेला महत्वपूर्ण माध्यम हुने विश्वास व्यक्त गरे । मेलामा विद्यार्थीले विशेष गरी विश्वका विभिन्न शिक्षण संस्था, तिनका शैक्षिक प्रणाली, पाठ्यक्रम, भर्ना प्रक्रियालगायतका विषयमा जानकारी प्राप्त गर्नेछन् ।

साथै विभिन्न देशका प्रतिनिधिहरूसँग पनि साक्षात्कार गर्न पाइने इक्यानले जनाएको छ ।

स्वदेशी तथा विदेशी शैक्षिक संस्थाहरु, विश्वविद्यालयहरु र त्यहाँ प्राप्त हुनसक्ने छात्रवृत्ति सुविधा एवम् गुणस्तरीय शिक्षामा नेपाली विद्यार्थीहरुको समुचित पहुँचको लागि परामर्श सेवा प्रदान गर्ने उद्देश्यले मेला आयोजना गरिएको अध्यक्ष भट्टराईले बताए ।

इक्यान उपाध्यक्ष तथा मेला संयोजक गीता सिवाकोटीले कोरोना महामारीपछि पहिलो पटक भौतिक रूपमा आयोजना हुन लागेको मेलाले विद्यार्थी र अभिभावकमा सकारात्मक सन्देश प्रवाह हुने विश्वास लिइएको बताइन् ।

मेलामा १५ हजार भन्दा बढि विद्यार्थी तथा अभिभावकहरुले अवलोकन गर्ने अपेक्षा गरिएको छ।
मेलामा इक्यानका सदस्य संस्थाका शैक्षिक परामर्श व्यवसायीहरु, स्वदेशी तथा विदेशी शैक्षिक संस्थाहरु तथा भारत, चीन, बंगलादेश, श्रीलंका, जापान, फ्रान्स, अमेरीका, बेलायत, न्युजील्याण्ड, अष्ट्रेलिया, नर्वे, फिनलैण्ड, मलेसिया, जर्मन, डेनमार्क, लगायत देशका कलेज तथा विश्वविद्यालयका अधिकारीक प्रतिनिधिहरुको सहभागीता हुने बताइएको छ ।

वन अप प्रा.लि.को व्यवस्थापनमा सञ्चालन हुने मेलाको Title Sponsor को रुपमा Real Dreams Educational रहेको छ भने in Association को रुपमा Ved International Education Pvt. Ltd र स्पोन्सरको रुपमा KIEC Pvt. Ltd., Orbit International Education Pvt. Ltd तथा Grace International Pvt. Ltd., Nobel Education Foundation, WRI र आईईएलटीएस पार्टनरको रुपमा British Council रहेको इक्यानले उल्लेख गरेको छ ।