क्वालालम्पुर, मलेशिया — मलेशियामा कार्यरत नेपाली आप्रवासी कामदारहरूको वित्तीय सुरक्षा र सचेतना बढाउने उद्देश्यले सन नेपाल लाइफ इन्स्योरेन्सले बैदेशिक रोजगार बीमा सम्बन्धी अन्तरक्रिया कार्यक्रम आयोजना गरेको छ। यस कार्यक्रममा मलेशियाका लागि नेपाली राजदूत माहामहिम डा. नेत्रप्रसाद तिमसिना प्रमुख अतिथिका रूपमा उपस्थित थिए।

कार्यक्रमको मुख्य उद्देश्य मलेशियामा कार्यरत नेपाली आप्रवासी कामदारहरूलाई बैदेशिक रोजगार बीमा, दाबी भुक्तानी प्रक्रिया, र यसका दीर्घकालीन लाभहरूबारे जानकारी दिनु थियो। सन नेपाल लाइफ इन्स्योरेन्सका प्रमुख कार्यकारी अधिकृत श्री राजकुमार अर्यालले आप्रवासी श्रमिकहरूको वित्तीय सुरक्षा र स्वास्थ्य सुरक्षामा बीमाको महत्वबारे विस्तृत जानकारी दिनुभयो।

श्री अर्यालले उल्लेख गरे कि सन नेपाल लाइफले नेपाली आप्रवासीहरूको आर्थिक र स्वास्थ्य सुरक्षामा महत्वपूर्ण भूमिका निर्वाह गर्दै आएको छ। उनले बताए कि कम्पनीले १३९ शाखा तथा उपशाखा कार्यालयहरू र २५ हजार भन्दा बढी अभिकताहरू मार्फत देशभर र विदेशमा रहनु भएका नेपाली नागरिकहरूलाई जीवन बीमा सेवा प्रदान गर्दै आएको छ।

मलेशियाका लागि नेपाली राजदूत डा. नेत्रप्रसाद तिमसिनाले यस्ता कार्यक्रमहरूले आप्रवासी नेपालीहरूको जीवनस्तरमा सकारात्मक परिवर्तन ल्याउन मद्दत गरेको बताउँदै सन नेपाल लाइफलाई धन्यवाद जनाउनुभयो। उनले आप्रवासी कामदारहरूलाई बीमा योजनाहरूबारे थप जागरूक बनाउन पनि आह्वान गर्नुभयो।

यस कार्यक्रम मार्फत मलेशियामा कार्यरत नेपाली आप्रवासी कामदारहरूलाई बैदेशिक रोजगार बीमाको महत्व र यसका लाभहरूबारे प्रत्यक्ष जानकारी दिइएको छ। सन नेपाल लाइफले आफ्ना ग्राहकहरूको वित्तीय सुरक्षामा निरन्तर समर्पित रहने बताउँदै यस्ता कार्यक्रमहरू भविष्यमा पनि जारी राख्ने घोषणा गरेको छ।