काठमाडौं। नेपाल अटोमोबाइल डिलर्स एसोसिएशन (नाडा) को एक प्रतिनिधि मण्डलले आज भन्सार विभागका महानिर्देशक महेश भट्टराईसँग भेट गरी अटोमोबाइल क्षेत्रसम्बन्धी विभिन्न विषयहरूमा छलफल गरेको छ। नाडाका महासचिव सुरेन्द्रकुमार उप्रेतीको नेतृत्वमा गएको प्रतिनिधि मण्डलले आगामी आर्थिक वर्ष २०८२/८३ को बजेट सम्बन्धी सुझावहरू पेश गरेको छ।

यस अवसरमा महासचिव उप्रेतीले नाडाका विभिन्न समितिहरूमा छलफल गरी तयार पारिएका बजेट सुझावहरू प्रस्तुत गर्नुभएको छ। उनले नाडाले स्वच्छ व्यवसायका लागि अनुकूल वातावरण निर्माण गर्न सरकारलाई सुझाव दिँदै आएको बताउनुभयो। उप्रेतीले अटोमोबाइल क्षेत्रलाई प्रभाव पार्ने नीतिगत तथा कर सम्बन्धी मुद्दाहरूमा पनि ध्यान दिन आग्रह गर्नुभयो।

भन्सार विभागका महानिर्देशक महेश भट्टराईले व्यवसायीहरूले स्वच्छ व्यवसायलाई आत्मसात गर्नुपर्ने बताउनुभयो। उनले नाडाका सुझावहरूलाई गम्भीरतापूर्वक विचार गरिने बताउँदै सरकारले व्यवसायी समुदायको सहयोगमा नै नीतिगत सुधार गर्ने प्रतिवद्धता जनाउनुभयो।

यस भेटघाटमा नाडाका सचिव विक्रम सिंहानिया, कोषाध्यक्ष मिलनबाबु मल्ल, लुब्रिकेन्टस् समितिका उपसभापति दिपक कुमार, सदस्य अमरज्योति रन्जितकर र अंकुर खनाल समेत उपस्थित थिए।

नाडाले पेश गरेका बजेट सुझावहरूमा अटोमोबाइल क्षेत्रलाई प्रोत्साहन दिने, कर नीतिमा सुधार गर्ने, र स्वच्छ व्यवसायलाई बढावा दिने जस्ता मुद्दाहरू समावेश छन्। यस छलफलले आगामी बजेटमा अटोमोबाइल क्षेत्रका लागि सकारात्मक नीतिहरू अवलम्बन गरिने अपेक्षा बढेको छ।