काठमाडौं । नेपालमा होण्डा सवारी साधनका ग्राहकहरूलाई अझ गुणस्तरीय र विश्वस्तरीय सेवा उपलब्ध गराउने उद्देश्यसहित पद्म ज्योति ग्रुपअन्तर्गतको स्याकार ट्रेडिङ कम्पनीले देशभर सेवा सञ्जाल विस्तार गर्ने घोषणा गरेको छ।

कम्पनीले पहिलो चरणमा छवटा अत्याधुनिक सर्भिस सेन्टर सञ्चालनमा ल्याउने योजना सार्वजनिक गरेको छ। यस विस्तारमार्फत ग्राहकहरूलाई छिटो, सहज र उच्चस्तरीय सेवा प्रदान गर्ने लक्ष्य राखिएको छ।

यसै क्रममा त्रिपुरेश्वर (पूर्व टेकुबाट स्थानान्तरण गरिएको) र कान्तिपथस्थित ज्योति भवनमा रहेका दुई नयाँ सेवा केन्द्रहरूको औपचारिक उद्घाटन सम्पन्न गरिएको छ।

उद्घाटन समारोहमा होण्डा मोटरका उपाध्यक्ष तथा एसिया र ओसियाना क्षेत्रका रिजनल अपरेसन्स प्रमुख तोसिओ कुवाहाराको प्रमुख आतिथ्य रहेको थियो। कार्यक्रममा स्याकार ट्रेडिङका चेयरम्यान सौरभ ज्योति तथा भाइस चेयरम्यान सुहृद ज्योतिको पनि उपस्थिति थियो।

कम्पनीले ग्राहकहरूलाई पहिलेकै मूल्यमा प्रिमियम सर्भिस उपलब्ध गराउने अवधारणा अघि सारेको जनाएको छ। यस अन्तर्गत सेवा गुणस्तर सुधार गर्दै ग्राहक अनुभवलाई अझ प्रभावकारी र सहज बनाउने लक्ष्य राखिएको छ।

स्याकार ट्रेडिङले आगामी दिनमा देशका विभिन्न भागमा थप सर्भिस सेन्टर विस्तार गर्दै होण्डा ग्राहक सेवालाई अझ सुदृढ बनाउने प्रतिबद्धता जनाएको छ।