काठमाडौं । प्रोफेसनल होल्डिङ्स् लिमिटेड (साविक प्रोफेसनल एजुकेटर्स लिमिटेड)को २०औँ वार्षिक साधारण सभा सम्पन्न भएको छ। सभा गत चैत्र २८ गते काठमाडौंको बानेश्वरस्थित ग्लोबल कलेजमा सम्पन्न भएको हो, जसमा कुल शेयरधनीमध्ये ८२.३४ प्रतिशतको उल्लेखनीय उपस्थिति रहेको थियो।

सभाले आर्थिक वर्ष २०८१/८२ का लागि सञ्चालक समितिको प्रतिवेदन, लेखापरीक्षकको प्रतिवेदन तथा वार्षिक वित्तीय विवरण सर्वसम्मत रूपमा पारित गरेको छ।

कम्पनीले शेयरधनीहरूलाई हाल कायम चुक्ता पूँजीको ५० प्रतिशत बोनस शेयर प्रदान गर्ने निर्णय गरेको छ। साथै, बोनस शेयरमा लाग्ने कर प्रयोजनका लागि २.६३१६ प्रतिशत नगद लाभांश वितरण गर्ने प्रस्ताव पनि पारित गरिएको छ।

यससँगै बोनस शेयर वितरणपछि बढ्ने पूँजी संरचनालाई मान्यता दिँदै कम्पनीको प्रबन्धपत्र संशोधन गर्ने प्रस्ताव पनि स्वीकृत भएको छ।

सभाले कम्पनीको केही प्रतिशत शेयर सर्वसाधारणमा निष्कासन (आईपीओ) गर्ने विशेष प्रस्ताव पारित गर्दै आवश्यक कानुनी तथा प्रशासनिक प्रक्रिया पूरा गर्न सञ्चालक समितिलाई पूर्ण अधिकार दिएको छ। यस निर्णयसँगै कम्पनीले सर्वसाधारणमा शेयर जारी गर्ने तयारी औपचारिक रूपमा अघि बढाएको जनाएको छ।

त्यसैगरी, संस्थागत सामाजिक उत्तरदायित्व अन्तर्गत विभिन्न सामाजिक कार्यहरूमा सहयोग गर्ने निर्णय पनि गरिएको छ।

यसै अवसरमा कम्पनीको सहायक संस्था युनिग्लोब हाईयर सेकेन्डरी स्कुल काठमाडौं लिमिटेडले पनि आर्थिक वर्ष २०८१/८२ का लागि ५ प्रतिशत बोनस शेयर र ०.२६३२ प्रतिशत नगद लाभांश वितरण गर्ने प्रस्ताव स्वीकृत गरेको छ।