काठमाडौं । नेपाल बीमा प्राधिकरणले विदेशी पुनर्बीमा दलालहरूलाई तीन महिनाभित्र नेपालमा कार्यालय स्थापना गर्न निर्देशन दिएको छ।

बीमकको पुनर्बीमा निर्देशिका, २०८० अनुसार प्राधिकरणमा सूचीकरण भई सूचीकरण नम्बर प्राप्त गरेका पुनर्बीमा दलालहरूले नेपालमा संयुक्त लगानीमा कम्पनी, शाखा वा सम्पर्क कार्यालय स्थापना गर्नु पर्ने व्यवस्था छ। तर, हालसम्म कार्यालय स्थापना नगरेका विदेशी पुनर्बीमा दलालहरूलाई तोकिएको समयसीमाभित्र आवश्यक प्रक्रिया पूरा गर्न निर्देशन दिइएको हो।

नेपालमा पुनर्बीमा व्यवसायलाई व्यवस्थित गर्न तथा बीमा क्षेत्रलाई सुदृढ बनाउन प्राधिकरणले यस किसिमको निर्देश जारी गरेको हो। यस कदमले पुनर्बीमा सेवामा पारदर्शिता वृद्धि गर्दै बीमा उद्योगको विश्वसनीयता र स्थायित्व कायम गर्ने अपेक्षा गरिएको छ।