काठमाडौं । ब्रिटिस काउन्सिल नेपालले अक्टोबर १५, २०२५ मा आयोजना गरिएको IELTS पार्टनर समिट मा उत्कृष्ट साझेदारलाई सम्मान गर्नुका साथै नयाँ अभियानहरूको शुभारम्भ गरेको छ। कार्यक्रममा अप्रिल २०२४ देखि मार्च २०२५ सम्म असाधारण योगदान पुर्‍याउने २० वटा साझेदार संस्थालाई विभिन्न श्रेणीमा सम्मान गरिएको हो।

प्लेटिनम पार्टनर अवार्ड अर्बिट मेडिकल इन्ट्रान्स प्रा. लि. ले पायो भने उत्कृष्ट संघ अवार्ड इक्यान लाई प्रदान गरियो। यसैगरी गोल्ड, सिल्भर र ब्रोन्ज श्रेणीमा विभिन्न शैक्षिक संस्था र संघहरूलाई पुरस्कृत गरियो।

कार्यक्रममा ग्लोबल च्यानल पार्टनर अभियान सुरु गरिएको घोषणा गरिएको छ। यस अभियानमार्फत सबै साना–ठूला संस्थाले समान प्रतिस्पर्धा गर्ने अवसर पाउनेछन्। उत्कृष्ट साझेदारलाई लन्डनस्थित ब्रिटिस काउन्सिल मुख्यालयमा आयोजित समापन समारोहमा सहभागी गराइने र शैक्षिक भ्रमणको अवसर प्रदान गरिनेछ।

त्यसैगरी, IELTS उपहार अभियानको तेस्रो संस्करण पनि सुरु गरिएको छ। टर्किस एयरलाइन्स, पठाओ र सफारीसँगको सहकार्यमा सञ्चालित यस अभियानअन्तर्गत IELTS परीक्षा दिने विद्यार्थीहरूले हरेक दिन, हरेक साता र महिनामा उपहार जित्ने मौका पाउनेछन्। बम्पर उपहारमा बेलायत, अमेरिका, अस्ट्रेलिया वा युरोपका लागि एकतर्फी हवाई टिकट, म्याकबुक एयर, विशेष सुटकेस तथा राइड र रेस्टुरेन्ट भौचर उपलब्ध हुनेछन्।

कार्यक्रममा नेपालस्थित बेलायती राजदूत रोब फेनले बेलायतलाई रोज्ने नेपाली विद्यार्थीको संख्यामा भइरहेको वृद्धिले शैक्षिक साझेदारहरूको योगदान र व्यवसायिकतालाई प्रमाणित गरेको बताए। ब्रिटिस काउन्सिल नेपालकी राष्ट्रिय निर्देशक प्रतिष्ठा थापा रायमाझीले साझेदार संस्थाको योगदानले नेपाली युवालाई रुपान्तरणमुखी अवसरहरू प्रदान गरेको उल्लेख गरिन्।