धनगढी, भदौ १७ – टाटा मोटर्सको नेपालका लागि एक मात्र आधिकारिक वितरक सिप्रदी ट्रेडिङ प्रा.लि. ले सुदूरपश्चिम प्रदेशलाई केन्द्रित गरी जी.ए.आर.एस ट्रेडिङ कन्सर्न लाई आधिकारिक डिलर नियुक्त गर्दै धनगढीस्थित बोराडाँडीमा नयाँ शोरूम उद्घाटन गरेको छ।

मंगलबार सम्पन्न उद्घाटन समारोहमा सिप्रदी ट्रेडिङ प्रा.लि. का सिनियर डिलर म्यानेजर मेघ राज ढुंगेल र जी.ए.आर.एस ट्रेडिङ कन्सर्नका प्रबन्ध निर्देशक अशोक पाण्डे ले संयुक्त रूपमा उद्घाटन गरेका थिए। सो अवसरमा स्थानीय समुदाय, व्यवसायिक प्रतिनिधि तथा ग्राहकहरूको उल्लेखनीय उपस्थिति थियो।

नयाँ शोरूममार्फत अब धनगढी मात्र नभई सुदूरपश्चिमका ग्राहकहरूले टाटा मोटर्सका विद्युतीय मोडलहरू — टाटा टियागो ईभी, पञ्च ईभी, नेक्सनके३ ईभी र कर्भ ईभी— सजिलै खरिद गर्न सक्नेछन्। त्यस्तै, आईसीई मोडलहरू अन्तर्गत टाटा टियागो, पञ्च, नेक्सन र सफारी पनि उपलब्ध हुनेछन्।

सिप्रदी ट्रेडिङले गाडी बिक्री मात्र नभई फाइनान्स सुविधा, सहज बीमा योजना, गुणस्तरीय सर्भिसिङ, आफ्टर–सेल्स सेवा तथा ब्याट्री डायग्नोस्टिक रेस्टोरेसन फेसीलिटी उपलब्ध गराउने जनाएको छ।

जी.ए.आर.एस ट्रेडिङ कन्सर्नका प्रबन्ध निर्देशक अशोक पाण्डेले भने, “यो शोरूममार्फत सुदूरपश्चिमका ग्राहकलाई टाटा मोटर्सका नवीनतम मोडलहरू नजिकबाट अनुभव गर्ने अवसर दिन पाउँदा गर्व महसुस गरेका छौं।”

सिप्रदी ट्रेडिङ प्रा.लि. का सिनियर डिलर म्यानेजर मेघ राज ढुंगेलले भने, “धनगढी शोरूमको उद्घाटनले टाटा मोटर्सको सेवा सुदूरपश्चिमसम्म विस्तार भएको छ। हामी ग्राहकलाई अझ नजिकबाट सेवा दिन उत्साहित छौं।”

सोही कार्यक्रममा गाडी बुक गरेका ग्राहकलाई गाडी हस्तान्तरण समेत गरिएको थियो।