काठमाडौं । भाद्र २३ र २४ गते भएको जन–जेडको नेतृत्वमा भएको आन्दोलनले देशमा ठूलो राजनीतिक परिवर्तन ल्याएको छ । उक्त आन्दोलनमा शहीद भएका नेपाली नागरिकप्रति श्रद्धाञ्जली अर्पण गर्दै र घाइतेहरूको शीघ्र स्वास्थ्य लाभको कामना गर्दै इन्फिनिटी होल्डिङ्सका अध्यक्ष दीपक भट्ट र शंकर ग्रुपका संचालक साहिल अग्रवालले संयुक्त प्रेस वक्तव्य जारी गरेका छन् ।

वक्तव्यमा हाल केही अनलाइन र सामाजिक सञ्जालमार्फत आफूहरूलाई जन–जेडका अगुवा सुदन गुरुङसँग जोडेर भ्रामक समाचारहरू प्रसारित गरिएको भन्दै आपत्ति जनाइएको छ । उनीहरूले कोभिड महामारीको समयमा मात्र ‘हामी नेपाल’ संस्थासँग मानवीय सहयोगका लागि सहकार्य भएको तर त्यसपछि कुनै सहकार्य नरहेको स्पष्ट पारेका छन् ।

यसैबीच, आन्दोलनका क्रममा तोडफोड र आगजनीका कारण जगदम्बा हस्पिटालिटी समूहको ब्यानरमा सञ्चालनमा आएको अन्तर्राष्ट्रिय चेन होटल हिल्टनमा ठूलो क्षति भएको जनाएको छ । उनीहरूले यो घटनाले नेपालको व्यवसाय, पर्यटन र आर्थिक क्षेत्रमा नकारात्मक असर पारेको बताउँदै पनि लगानी र उद्यमशीलतालाई निरन्तरता दिने दृढता प्रकट गरेका छन् ।

भ्रामक र कपोलकल्पित समाचारप्रति असन्तोष व्यक्त गर्दै सञ्चारमाध्यमहरूले सत्य तथ्यका आधारमा मात्र समाचार प्रकाशन गर्नुपर्नेमा जोड दिइएको छ । साथै, नेपाली दाजुभाइ–दिदीबहिनीलाई यस्तो गलत प्रचारप्रति भ्रमित नहुन पनि अपिल गरिएको छ ।