काठमाडौं । एनआईसी एशिया बैंक लिमिटेडको सञ्चालक समितिको अध्यक्ष पदमा अशोक कुमार अग्रवाल नियुक्त हुनुभएको छ। बैंकको मिति २०८२/०९/०९ मा बसेको सञ्चालक समितिको ७४४औँ बैठकले आजकै मितिदेखि लागू हुने गरी उहाँलाई अध्यक्ष पदमा नियुक्त गर्ने निर्णय गरेको हो।

नवनियुक्त अध्यक्ष अग्रवालले आजै नेपाल राष्ट्र बैंकका गभर्नर प्रा. डा. विश्वनाथ पौडेलबाट पद तथा गोपनीयताको शपथ ग्रहण गर्नुभएको छ।

बैंक तथा वित्तीय क्षेत्रमा दीर्घकालीन अनुभव हासिल गर्नुभएका अग्रवालले बैंकिङ, वित्तीय, बीमा तथा कर्पोरेट क्षेत्रमा सफल नेतृत्व प्रदान गर्दै मुलुकको आर्थिक विकासमा महत्वपूर्ण योगदान पुर्‍याउँदै आउनुभएको बैंकले जनाएको छ। उच्च नेतृत्वदायी क्षमता, दूरदृष्टि र स्पष्ट रणनीतिका साथ दीर्घकालीन योजनामा विश्वास राख्नुहुने उहाँको कार्यकालमा बैंकले थप उल्लेखनीय उपलब्धि हासिल गर्ने अपेक्षा गरिएको छ।

अग्रवालको नेतृत्वमा एनआईसी एशिया बैंकले थप सफलता प्राप्त गर्दै आफ्नो प्रतिष्ठालाई नयाँ उचाइमा पुर्‍याउने दृढ विश्वास बैंकले व्यक्त गरेको छ।