काठमाडौँ । नेपालको राष्ट्रिय महिला फुटबल टोलीकी उत्कृष्ट खेलाडी तथा राष्ट्रिय गौरवकी प्रतीक साबित्रा भण्डारी (साम्बा) को उपचारका लागि रिलायबल नेपाल लाइफ इन्स्योरेन्स लिमिटेडले आर्थिक सहयोग प्रदान गरेको छ । कम्पनीले आफ्नो संस्थागत सामाजिक उत्तरदायित्व (CSR) कार्यक्रम अन्तर्गत दुई लाख रुपैयाँ सहयोग उपलब्ध गराएको हो ।

हाल गम्भीर घुँडाको चोटका कारण शल्यक्रिया तथा दीर्घकालीन उपचार आवश्यक परेको अवस्थामा उहाँको शीघ्र स्वास्थ्यलाभको कामना गर्दै कम्पनीले मानवीय संवेदना र सामाजिक उत्तरदायित्वप्रतिको प्रतिबद्धता अनुरूप उक्त सहयोग प्रदान गरेको जनाएको छ ।

साम्बाले राष्ट्रिय तथा अन्तर्राष्ट्रिय स्तरमा उत्कृष्ट प्रदर्शन गर्दै नेपाललाई गौरवान्वित बनाउँदै आएकी छन् । नेपाली महिला फुटबलको पहिचान स्थापित गर्न तथा महिला खेलकुदलाई नयाँ उचाइमा पुर्‍याउन उनको योगदान महत्वपूर्ण मानिन्छ । यस्तो चुनौतीपूर्ण परिस्थितिमा उनीप्रति ऐक्यबद्धता जनाउनु र आवश्यक सहयोग गर्नु आफ्नो सामाजिक दायित्व भएको कम्पनीको विश्वास रहेको छ ।

रिलायबल नेपाल लाइफ इन्स्योरेन्स लिमिटेड सामाजिक, मानवीय तथा खेलकुद प्रवर्द्धनसम्बन्धी गतिविधिहरूमा सधैं अग्रसर रहँदै आएको संस्था हो । कम्पनीले आगामी दिनहरूमा पनि राष्ट्रहित तथा समाजमुखी पहलहरूमा निरन्तर योगदान पुर्‍याउने प्रतिबद्धता व्यक्त गरेको छ ।