काठमाडौं। हिमालयन लाइफ इन्स्योरेन्स लिमिटेड ले कम्पनीमा कार्यरत एजेन्सी मेनेजरहरूलाई अनलाइन माध्यमबाट बीमा प्रस्ताव पेश गर्न सक्ने सुविधा प्रदान गरेको छ। कम्पनीले आफ्नो सफ्टवेयर सिस्टममार्फत एजेन्सी मेनेजरहरूलाई पहुँच उपलब्ध गराउँदै यस्तो व्यवस्था गरेको जनाएको छ।

कम्पनीका अनुसार एजेन्सी मेनेजरहरूले अब घर वा कार्यालयमै बसेर बीमा प्रस्ताव कम्पनीमा पेश गर्न सक्नेछन्। यसका लागि एजेन्सी मेनेजरहरूले सफ्टवेयर सिस्टममा रहेको ‘एजेन्सी पोर्टल’ प्रयोग गरी आफूले संकलन गरेको बीमा प्रस्ताव स्वीकृतिका लागि कम्पनीमा पठाउन सक्ने व्यवस्था मिलाइएको छ।

एजेन्सी मेनेजरहरूले बीमा प्रस्तावका लागि आवश्यक कागजात तथा विवरणहरू एजेन्सी पोर्टलमार्फत पेश गरेपछि कम्पनीले अनलाइन माध्यमबाट अन्डरराइटिङ प्रक्रिया अघि बढाउनेछ। आवश्यक प्रक्रिया पूरा भएमा बीमा प्रस्ताव स्वीकृत गरिने व्यवस्था गरिएको कम्पनीले जनाएको छ।

कम्पनीका प्रमुख कार्यकारी अधिकृत कपिल कुमार दाहाल का अनुसार एजेन्सी मेनेजरलाई अन्डरराइटरको हिस्साजस्तै जिम्मेवारी र पहुँच दिने उद्देश्यले यस्तो सुविधा उपलब्ध गराइएको हो। उनले निश्चित शर्तहरू पूरा गरेका एजेन्सी मेनेजरहरूलाई मात्र यो सुविधामा पहुँच दिइने जानकारी दिए।

कम्पनीका अनुसार एजेन्सी पोर्टलमार्फत एजेन्सी मेनेजरहरूले व्यवसायसम्बन्धी रिपोर्ट लगायतका विवरणहरू पनि हेर्न सक्ने व्यवस्था गरिएको छ। आगामी दिनमा यस्ता प्रविधिमैत्री सुविधालाई अझ विस्तार गर्दै सेवा प्रणालीलाई थप सहज र प्रभावकारी बनाउने कम्पनीको योजना रहेको जनाएको छ।