गोरखा। मनकामना मन्दिर दर्शन गरेर फर्किँदै गरेका भारतीय नागरिक सवार माइक्रोबस दुर्घटना हुँदा ७ जनाको मृत्यु भएको छ।

गोरखा जिल्लाको सहिद लखन गाउँपालिका–३ कान्टार क्षेत्रमा बाप्र ०१–००६ ख ८४३० नम्बरको माइक्रोबस शनिबार साँझ दुर्घटना भएको प्रहरीले जनाएको छ।

दुर्घटनामा परेर ७ जना भारतीय नागरिकको घटनास्थलमै मृत्यु भएको प्रारम्भिक जानकारी प्रहरीले दिएको छ। साथै दुर्घटनामा अन्य ७ जना घाइते भएका छन्।

घाइतेहरूको उद्धार गरी उपचारका लागि नजिकैको अस्पताल पठाइएको जनाइएको छ। दुर्घटनाको कारण र मृतक तथा घाइतेहरूको विस्तृत विवरण आउन बाँकी रहेको प्रहरीले जनाएको छ।